Shillong, Nailur 23
Ka Kad Liengsuiñ ha Umroi kaba dang donkam shuh ban shna pynheh, ka dang donkam ban ïoh jaka sa 22 Akar ha kaba 6 Akar yn shna kum ka jaka ïeng ki liengsuiñ, bad kaba donkam eh ka long ban pynjrong shuh shuh ïa ka jaka mareh (runway) ki liengsuiñ sa 751 metre khnang ba ki liengsuiñ kiba heh kin lah ban kiew ban hiar.
Lada shna pynjrong ïa ka runway sa 751 metre na ka 1,829 metre kaba la don lypa, kane ka Kad Liengsuiñ ka don ïa ka runway kaba jrong kumba 2,400 metre. Lada jrong ka runway, kan kham pynsuk ïa ki liengsuiñ ha ka por ba kiew sha suiñ (taking off) bad ha ka por ba hiar (landing).
Nalor ka jingpynjrong ïa ka runway, donkam ruh ban shim jaka shuh sa 22 Akar kynthup 6 Akar na ka bynta ban shna ïa ka jaka ïeng ki liengsuiñ.
Katkum ka jingbatai u Symbud Myntri Rangbah u Bah Sniawbhalang Dhar uba peit ïa ka tnat Transport, hadien ka jingleit khmih ïa ka Kad Liengsuiñ ha Umroi ha ka Lah Sngi U Blei, la ong ba ynda ïoh ban shim jaka shuh, ka jingpom ïa katto-katne ki lum rit kiba don hajan ka lad liengsuiñ yn nym donkam shuh.
Ha kane ka jingleit khmih ïa ka kad liengsuiñ, la donlang ki ophisar jong ka Airport Authority of India (AAI) kiba wan na Delhi bad Guwahati nalor u Chief Secretary ka Jylla, Bah DP Wahlang lem bad ki ophisar ka tnat Transport bad ki ophisar na kiwei-kiwei ki tnat.
Haba kylli kham bniah na u Commissioner and Secretary ka tnat Transport, u Sanjay Goyal u la ong ba ka kad liengsuiñ ha Umroi mynta ka don ka runway kaba jrong 1,829 metre bad yn donkam shuh sa 751 metre khnang ba ka jingjrong ka runway kan long haduh 2,400 metre.
U la ong ba ka AAI ka la phah ïa ka kaiphod jong ka halor ka jingkhmih bniah ïa ki jingdonkam ban shna pynheh ïa ka kad liengsuiñ bad na ka liang ka Sorkar Jylla ka la dep ai sha ka AAI kumba T.4 klur na ka bynta ban leh ïa kane.
Haba kylli sa katno spah ne hajar klur yn dang donkam ban shna pynheh ïa ka kad liengsuiñ, u Goyal u la ong ba ïa kane ym pat lah ban batai mynta namar kan sa don ka jingai jingkheiñ kaba bniah katkum ki jingdonkam.
U la ong ba ka AAI ruh kan bei pisa lang ha ryngkat ka Sorkar Jylla kaba dei ruh ban kitkhlieh ban pynïoh ïa ka jaka sa 22 Akar.
“Ka Sorkar Jylla ka shimkhia ban pynïoh ïa ka jaka nalor kiwei pat ki jingdonkam kiba dei ban pynbiang kum ka jingai jingbit ban pynheh ïa ka kad liengsuiñ,” la bynrap u Goyal.
Na ka por sha ka por, ka Ïingbishar Meghalaya High Court ruh ka la ïai bthah ïa ka Sorkar Jylla ban pynbiang ïa ki jingdonkam ban ïoh wan ki liengsuiñ kiba kham heh ha Kad Liengsuiñ ha Umroi.
Ka Ïingbishar ka la kdew ruh ïa ka kad liengsuiñ ha Paro kaba don ha Bhutan ha kaba ki liengsuiñ kiba heh ki kiew ki hiar wat hapdeng ka jinglong-jingman kaba kham syier. Ka Ïingbishar ka la ong ba lada ka kad liengsuiñ ha Paro ka lah ban treikam bha, balei ka lad liengsuiñ ha Umroi kam lah?
