Shillong, Nailur:
U MDC ka Tura, Bernard N. Marak u la kyrpad ïa ka Sorkar ban sangeh ïa ka jingpyrshang ban knieh jaka na ki Nokma Akhing khlem da ïoh pdiang ha ka rukom kaba dei bad kaba long pyrshah ïa ka jingmynjur u Nokma.
“Ka Sorkar Jylla hapoh ka jinglong Myntri Rangbah u Conrad Sangma, i kumba ka don ka jingpyrshang kaba jur ban knieh jaka na Tura da kaba pynkheiñ pura ïa ka hok jong ki paidbah khlem da pdiang ba kane ka dei ka jaka lum kaba hapoh ka Khyrnit Hynriew jong ka Riti Synshar. Ka Sorkar ba ïalam da ka NPP ka dang bteng ban ñion ïa u duk u suk kiba la jied ïa ka BJP, bad khñiot ïa ka hok ban ïoh ïa kino-kino ki lad jingïarap na ka Sorkar Pdeng da kaba kam ïa ka jaka kum ka jaka GAD khlem da ïoh pdiang ha ka rukom ba dei,” la ong u Marak ha ka shithi ba la phah sha u Myntri ka tnad GAD, u Rakkam Sangma.
Haba kdew ba ka Sorkar Jylla kam dei ka ‘Tribal’ bad kam lah ban kurup ïa ki jaka ‘riewlum khlem da ïoh pdiang ha ka rukom kaba dei, u la ong ba ki hok jong ki ‘riewlum ki la shah pynkheiñ ha ki por ba la leit noh da kaba knieh jyndat ïa ka jaka na ka thaiñ Akhing khlem ka jingmynjur jong u Nokma ne ka jingïoh pdiang ha ka rukom ba dei.
“Kumba phi lah ban tip ba ha Tura, kaba dei ruh ka konstitwensi u Myntri Rangbah, ki nongshong shnong ha kiba bun ki jaka ki la mad jingeh ban ïoh ïa ki skhim ka Sorkar Pdeng namar ba ka Sorkar Jylla ka la kam ba ka dei ka jaka jong ka GAD. Ki jaka kiba la shah kurup be-aiñ da ka Sorkar ki long naduh Nikwatgre haduh Walbakgre 1046 ‘bigha’, ka ITI Campus kaba heh kumba 91 ‘bigha’, ki ‘de-reserved area’ palat 150 ‘bigha’, ka ‘Sepoy Colony’ bad mynta dang shen, ka Sorkar ka pyrshang ban knieh ïa ka jaka ki ‘Leper’ kaba don ka jingheh kumba 390 ‘bigha’,” u la ong.
U la ong ruh ba baroh kine ki jaka ki dei hapoh ka khyndew Akhing bad u Nokma u la ai kot sha kiba bun ki nongshong shnong bad don kiba la don lypa ki ‘patta’ hynrei ka GHADC ka la ai patta sha ki tnad Sorkar khlem ki kot ki sla na u Nokma – kaba long ka jingpynkheiñ kaba jur ïa ka hok jong ki ‘riewlum.
“Balei ba baroh ki ‘Administrative District’ ki don ïa ka kyntien “Hill” hadien ka kyrteng jong ki, ka long ban pynkynmaw ba ka Sorkar Jylla ka treikam ha ki jaka jong ki ‘riewlum. Kumta, ka Jylla kam don hok ban kurup ïa ka jaka kaba dei hok jong ki Nokma. Na bynta kata, wat ki ‘Gazette’ jong ka snem 1975 bad 1977 ki la kren shai ba ‘Sorkar ka jied ban sdang biang hapoh ka por jong ka jingaiwai ha ka jaka ban shim jaka katkum ka aiñ’. Nga don ïa ka por jong ka jingaiwai ba la kdew ha ka ‘Gazette’ bad katkum kata, ki Sorkar Jylla ki dei ban siew ïa ki ‘Awil Fees’ sha ki Akhing Nokma kiba nga ngeit ba ka Sorkar ka la sangeh ban siew 40 snem mynshwa,” la ong u Marak.
Haba phai sha ka jaka ki ‘Leper’, u la ong ba ki nongshong shnong ka ‘Leper Colony’ ki don ïa ka kot ki sla ‘Nokma’ pyrshah ïa kaba ka GHADC ha ka por jong u W.Ch. Marak (2016) u la ai be-aiñ ïa ka ‘patta’ sha ka tnad ka koit khiah khlem ka jingmynjur jong u Nokma bad khlem da pdiang ïa ka shithi ba la phah sha u da u Deputy Commissioner.
“Sangeh noh ïa baroh ki kam ban kam be-aiñ ïa ki jaka Akhing kum ka jaka GAD namar ba ka pynkheiñ jur ïa ki kyndon jong ka Khyrnit Hynriew bad ka ‘The Right to Fair Compensation and Transparency in Land Acquisition, Rehabilitation and Resettlement Act, 2013,” la ong u MDC.
Shuh shuh haba ban jur ban sangeh mardor ïa ka jingpyrshang ban kurup be-aiñ ïa ka jaka ki ‘riewlum naba ka lah ban wanrah jingeh, u la bynrap, “Sngewbha wat pynkheiñ ïa ka Riti Synshar ka ri India bad ïa ki aiñ ba la buh ban ïada ïa ki ‘riewlum – lada ym lah ïa kata, ka lah ban pynbor ïa nga kum u dkhot jong ka District Council (MDC) jong ka Tura ban kob ïa phi bad u Myntri Rangbah sha ka tyrko nia paidbah.”
