Shillong, Nailur 23
Ka Meghalaya State Planning Board (MSPB) ha ka Lah Sngi U Blei ka la pan jingtip na kiba bun ki tnat treikam ka Sorkar Jylla na ka bynta kumno ban weng ïa ka dheng kali kaba dang ïai bteng ha nongbah Shillong.
Ki tnat kiba ka Planning Board ka la pan jingmut ki kynthup ïa ka tnat PWD, ka tnat Pynroi Sor, ka tnat Pulit bad ka tnat Transport.
U Chairman ka Planning Board, Bah Metbah Lyngdoh, u la ong ba kane ka jingïalang ka long ban wad ïa ki daw tynrai halor ka jingdheng kali ha nongbah Shillong bad ban wad ïa ki lad ki lynti na ka bynta ka jingmyntoi bad jingshngaiñ ha ka leit ka wan jong ki paidbah.
La ong ba ha ka jingïakren ha kane ka jingïalang, na ka liang jong ka tnat Pulit ka la kdew halor ka jingduna jong ki pulit kum kawei na ki daw ba kongsan kaba wanrah ïa ka jingdheng kali bad ka jingeh ha ka leit ka wan.
Ka tnat Pulit ka la pynpaw ruh ïa ka jingeh ban wanrah ïa ka rukom ïaid beit ïaid ryntih jong ki kali ha kylleng ka nongbah, namar kumba long mynta ki don tang 150 ngut ki pulit pynïaid kali, hynñiew tylli ki thanat bad kumba 400 ngut ki pulit na ka tnat Home Guard.
Kumta halor kane, na ka liang jong ka Planning Board ka la pyntip ba kawei na ki jingai jingmut ban phah sha ka Sorkar kan dei halor ka jingduna jong ki nongtrei.
U Bah Metbah Lyngdoh u la ai jingmut ruh ba ka jingpynkynriah ïa ki ophis sorkar sha New Shillong kan lah ïarap ban pynduna ïa ka jingeh na ka dheng kali bad ka leit ka wan ha kane ka nongbah. Halor ki jingthmu bad jingai jingmut jong ka Board, u la ong ba ka rai kaba khatduh halor ka jingpynkynriah kan shong pat ha ka Sorkar Jylla.
