Shillong, Nailur 24
Ka East Khasi Hills district ka la nang sakhi ïa ka jingkiew ha ka jingdon kiba khaïi drok bad ïa kane la ïohi lyngba ka jingbun ki jingmudui bad kiba shahkem ha kine ki 6 snem duna.
Haba ai jingkheiñ naduh u snem 2019 haduh Nailar, 2024, ki la don haduh 250 tylli ki jingmudui pyrshah ïa kiba khaïi drok bad baroh kiba shahkem ki long 485 ngut ha kine ki 6 snem duna.
Tang ha u snem 2023, ki pulit ka East Khasi Hills district ki la ïohkem bun eh kiba khaïi drok khamtam ha nongbah Shillong ha kaba ki jingmudui ki long 71 tylli bad kiba shahkem ki long 133 ngut.
Haba ïakren bad u Superintendent of Police ka East Khasi Hills district u Bah S Nongtnger, u la kubur ba u drok u la nang jyllei khamtam ha nongbah Shillong.
U la ong ba kam don ka jingshisha hangno-hangno ruh ban shu kynnoh ba ki pulit ki khlem leh eiei ban tehlakam ïa u drok namarba ki pulit ki trei shitom wat hapdeng shibun ki jingeh naduh ka jingduna pulit bad ka jingbym lah ban talasi naphang kat ïa ki kali kiba ïaid namar ka ktah ïa ki nongleit nongwan. U SP u la ong ba ha kine ki 6 snem duna, la ïoh kurup tang ïa u heroin haduh 16.5 kilo nalor u ganja kumba 2 kilo bad opium ruh kumba 2 kilo tam bad kiwei kiwei ki dawai kum u kuli Yaba Tablet bad kiwei.
U la ong ba ka jingïakhun ïa u drok kam dei kaba suk lada ym don ka jingïatreilang lang jong ki nongshong shnong, namar tang ki pulit hi ym lah ban tehlakam.
Nalor kane, u la ong ba ka tnat pulit ka la nang pynsngewthuh ïa ka jingdonkam ban ïatreilang ki nongshong shnong bad ban thaw ruh ïa ka kynhun Village Defence Party (VDP) ha ki shnong ban tehlakam ïa ki kam sniew kynthup ïa ka jingjyllei u drok. U la ong ba ki jingmudui bad shahkem kiba donkti ban khaïi drok ki kham bun ha nongbah Shillong haba kheiñ ïa ka East Khasi Hills district bad bun ki jingmudui kiba la dep ‘chargesheet’ bad poi sha Ïingbishar na ka bynta ka jingbishar.
Haba kylli la ka Shillong ka dei ka ktem u drok ne ka jaka ïaid lynti une u jingdih basniew, u SP u la ong ba ka nongbah Shillong ka dei ka lynti ïaid u drok ba wan pynpoi na kiwei ki jaka bad ki ri kum ka Myanmar. Kumta u SP u la ong ba ka tnat pulit kan ïai bteng ban ïakhun ïa kane ka jingeh kaba ktah ïa ka imlang-sahlang bad u kyntu ïa ki paidbah ban ai ka jingïatreilang.
