Shillong, Nailur 24
Kum shibynta ban pynneh-pynsah ïa ka riti ka dustur, ka Khasi Indigenous Foundation ha ka 24 tarik Nailur 2024 ka la pynbna paidbah ba kan sa pynlong ïa ka ‘Khasi Traditional Show’ ne ka jingpyni ïa ki tynrai u Khasi na ka bynta ki paidbah ka Jaidbynriew Hynñiewtrep.
Haba kren bad ki nongthoh khubor ha Shillong Press Club, u Director ka Khasi Indigenous Foundation, u Bah Niman N Shadap u la pynbna paidbah ba ka Foundation kan sa pynlong ïa kane ka ‘Khasi Traditional Show’ bad u la kyntu ïa baroh ki paidbah ka Bri u Hynñiewtrep ban ïashim bynta ha kane ka jingïakob la ka dei ha ka jingrwai ne shad ne ha ka tem ka put tynrai ruh kumjuh.
U la ïathuh ba ïa kane ka jingïakob, na ka liang ka Foundation ka la pynlong nyngkong eh mynshem snem lyngba ka ‘online’ bad kane kan dei ha ka sien kaba ar.
Ïa kane ka ‘Khasi Traditional Show’, yn pynlong da kaba shu phah ‘Online’ ha u whatapp number 81318 03454 lane 98637 99299 ka ban sdang naduh ka 10 tarik Risaw 2024 bad ïa ka tarik ba khatduh ban phah ïa ki video kan long ha ka 20 tarik Risaw 2024.
U la ïathuh ba kiba wan nyngkong ha kane ka jingïakob kin ïoh ïa ka song pisa T.12,000 ha ryngkat ki jingai sngewbha, kiba wan ba-ar kin ïoh ïa ka song pisa T.6,000 ha ryngkat ki jingai sngewbha, kiba wan ba-lai pat kin ïoh ïa ka song pisa T.3,000 ha ryngkat ki jingai sngewbha, kiba wan ba saw kin ïoh T.1,500 ha ryngkat ki jingai sngewbha bad kiba wan ba san kin ïoh T.1,000 ha ryngkat ki jingai sngewbha.
Baroh kiba ïashim bynta ki dei ban phong da ka riam tynrai, bad ki dei ban rwai da ki jingrwai Khasi, Maram, Bhoi bad kiwei-kiwei bad yn nym shah ban rwai da ki jingrwai Hindi ne phareng ban shad ne rwai.
“Kino-kino kiba don ka jingmut bad ka sap ka phong, ki lah ban rwai ne ban shad bad ki donkam ban riam da ki riam tynrai jong u khun Khasi-Khara”, ong u bah Shadap.
U la pynbna ruh ba ka Foundation kan ym shim satia ïa ka bai rung na ka bynta kiba ïashim bynta ha kane ka jingïakob.
Ka jingbishar kan long beit katkum ka jingbishar ki nongbishar, kan ym don ka jingphah die ïa ki coupon ne kiwei-kiwei.
U la kyntu ïa baroh ki paidbah ka bri u Hynñiewtrep ba kin ïashim bynta lang ha kane ka jingïakob khnang ban pynneh pynsah ïa ka riti ka dustur tynrai, khamtam ka phong ka sem tynrai ba kan neh kan sah pateng-la-pateng namar ba katba dang mih ki sngi, ka dustur bad ka riam tynrai ka la nang jah.
