Shillong, Nailur:
Ka North-Eastern Hill University Students’ Union (NEHUSU) ka la dawa na u Vice-Chancellor (VC) ka skulbah, u Prof. Prabha Shankar Shukla ban khot kyrkieh ïa ka jingïalang jong ka ‘Academic Council’ hapoh shi taïew ban ïakren halor ka jingpyntreikam ïa ka rukom ai kyrdan ’10 Point’ kumba la ai jingmut da ka University Grants Commission (UGC).
Haba ïakren bad ki lad pathai khubor hadien ka jingïalang, u President ka NEHUSU, u samla Sandy Sohtun u la pynpaw ba ka seng kan sa rai halor ka sienjam ka ban sa shim hadien lada u VC um lah ban khot ïa ka jingïalang ba kyrkieh jong ka ‘Academic Council’.
Kum ban shu kdew hangne, u Prof. Shukla hashuwa, u la kyntait ban ïakynduh ïa ka NEHUSU, hynrei ka seng ka la rai ban rung hi dalade sha kamra jong u hadien ba ka la ap ïa ka jingkhot jong u haduh ka por 3 baje janmiet.
Ha ka shithi ba la ai sha u VC, u samla Sohtun u la kren shai ba ka seng ka dawa ban pyntreikam noh mardor ïa ka ‘Draft Ordinance OC-20’, ïa kaba la mynjur ha ka jingïalang ba 112 jong ka ‘Academic Council’ kaba la long ha u Jylliew mynta u snem na ka bynta ki kynhun ka samoi pule 2022-2024 shaneng.
