Shillong, Nailur 24
Ka Kong Ampareen Lyngdoh kaba dei ka Myntri ba khmih ïa ka tnat ka Koit ka Khiah ka jylla, ha ka Sngi Ba-ar ka la pyntip ba ka aiñ kam shah satia ban pynkynriah ïa ka Opioid Substition Therapy (OST) Centre na Civil Hospital.
Haba kren sha ki lad pathai khubor, ka Kong Ampareen ka la ong, “Ngi la ïakren shi slem bha ha kato ka sngi, ha kaba la pyntip sha nga ba ka la don ka jingdawa ban pynkynriah ïa ka OST hynrei ka aiñ kam shah ban ïaid sha kata ka lynti.”
Lah ban kdew ba dang shen na ka liang jong ka HYC ka la buh ka jingdawa na ka tnat ka koit ka khiah ba ka dei ban pynkynriah noh ïa ka OST Centre na Civil Hospital Shillong namar ka la pynthut bad buh jingma ïa ki nongleit shim dawai na katei ka jaka ai jingsumar.
Ka Kong Ampareen ka la ong, “Ngi donkam mynta ban wad bniah, ban kylli ba balei ba ki don kita ki jingduna hapoh kane ka rukom pynïaid bad ngi donkam ruh ban wad bniah ïa ki lad ki lynti kumno ban ïaleh ban pynbha ïa ka jingtreikam ka Center”.
Shuh shuh na ka liang jong ka Myntri ka la pynpaw ruh ïa ka jingkmen ïa ka jingwan shakhmat jong ka kynhun Drug Users Association, kiba la shim kam halor ban peit bad khmih bad ruh ban phah da ki Volunteers ban ïatreilang bad ki bor pynïaid ka Hospital ban pynïaid beit ïaid ryntih ïa ka OST.
“Kam long satia kaba biang bad ïahap ban treikam da kaba shu beh ïa ki briew bad buh ïa ki ha ki jingeh ba kham jngai na ka jinglah ban ïoh jingïarap,” la ong ka Myntri.
Haba kyntu ïa ka HYC ban ïatreilang bad ka Sorkar, ka Myntri ka la ong “Ïarap ïa ka sorkar, lada phi ïohi ba ki don kine ki jingleh pyrshah ïa ka imlang sahlang, ha ka jaka ban beh ïa ki, to ngin wad ïa ka lad ban ïarap ïa ki. Kata ka dei tang ka lad kaba ngi hap ban pynïaid namar ym don da kumwei pat ka lad kaba yn shah da ka aiñ”.
