Bah Erwin K Syiem Sutnga
Ka jingpynphai noh ïa ka khyndew European Ward hapoh ka jingpeit jong ka Khasi Hills Autonomous District Council (KHADC) ka dei ka dawbah ba dang sahteng naduh 1947. Mynta ha kane ka khyllipmat ba la mih biang ka jingthmu ban pynbha ïa ka Khyrnit kaba Hynriew, nga sngew ba ka biang bha ka por ban ïakren bad dawa ïa kane. Ïa kane nga kynmaw ba dei u Bahdeng HS Shylla (bam kwai ha dwar u Blei) uba kren bha ïa kane bad bunsien ngi ju ïaphylliew jingmut kumno ban leh ïa kane.
Khamtam kum ïa ki jaka ba don ha ka European Ward, kynthup ïa ka Police Bazar, Jail Road bad Oakland ha Shillong ter ter shaduh Secretariat bad Governor House shaduh ki ranab lum hajrong ka Polo haduh rud Wah Umkhrah. Kine ki jaka ki dei hok ki jong ki Kur kum ki Nongkhlaw bad Kharkongor ha ki por mynshuwa. Ki la shah shim noh ha ki por ba thaw ïa ka Sor Shillong da ki Phareng ha u snem 1863 bad ka por Sorkar hadien da kaba kynthup ïa kine ki jaka hapoh ka Para 20 jong ka Sixth Schedule. Halor ka hok ka jong ki Kur Nongkhlaw haduh u snem 1985 ki dang ïoh ïa ka byrta (notice) na ka ophis u Deputy Commissioner East Khasi Hills ban wan shim noh ïa ka bai wai.
Hapdeng ka jingmih ka jingïaknieh pat de ki khun kur Nongkhlaw ïa ka hok long trai ki kpoh Kur la leit sha ka Gauhati High Court ban dawa pynphai biang ïa ki khyndew kiba long trai ka Kur Nongkhlaw namarba la shu aiwai sha ka Sorkar Phareng.
Ka Para 20 jong ka Khyrnit Hyniew (Sixth Schedule)
Ka Para 20 ka kren shaphang ki “Tribal Areas” ne “Jaka Trai Ri” kiba don hapoh ka jingsynshar ki Autonomous District Council ha ki Jylla Assam, Meghalaya, Tripura bad Mizoram. Ha kaba ïadei kine ki jaka ba la kynthup hapoh u pud jong ka Shillong Municipality Board bad ka KHADC, la khang pyrshah ïa ka jingtreikam ka Para 3 ha kaba ïadei bad ka jingthung ïa ki Rangbah Shnong bad Nongsynshar bad ka synshar shnong hapoh kitei ki jaka ba long lait. La weng ruh ka bor bishar aiñ hapoh ka Para 4 bad 5, ki bor wanrah ka roi ka par (development) hapoh Para 6, ban lum khajna ka KHADC hapoh ka Para 8 bad ban ai trading license hapoh ka Para 10. Ha ka jingshisha ïalade ngam ïohi ïa ka jingkhang halor ka khyndew ka shyiap hynrei ka ïatyngkhuh pat de bad ka Sorkar Meghalaya.
Ka nuksa jong ka Mynnor
Ki jingkylla kiba wan hadien ka jingïoh laitluid ka ri India ruh ki la buh ïa kiba bun ki jingeh khamtam ha kaba la thaw ïa ka Sixth Schedule. Hangne ngi lah ban ïohi ba da ka bym biang ka jingïasaid hakhmat ka Constituent Assembly bad ka jingbym biang u nongmihkhmat ka Federation of Khasi States uwei u S. Guha, kum ka Jaidbynriew ruh ngi la duh noh ïa kine ki jaka. Ka KHADC ka don ka bor ban peit bad sumar ia ki khyndew kiba hap hapoh jong ka katkum ka bor ba hapoh ka Para 3, hynrei da kaba pyndonkam ïa ka Para 20 lah iehnoh shabar ïa kine ki jaka. Katkum ka jingshisha ki kyndon ka Section 7 jong ka Indian Independence Act 1947 kine ki jaka ki la dei ban wan phai biang sha ki Kur kiba dei trai ïa ki. Katei ka kyndon aiñ ka ong ba baroh ki jingïateh ki nongsynshar trai ri lane ki bor pynïaid trai ri bad ka Sorkar Phareng kin kut noh mar ïa mih noh ki phareng. Wat ka Standstill Agreement bad ka Instrument of Accession ha ka Annexed Agreement ka kren shai ba ïa ka khyndew ka shyiap yn nym ktah bad don kano-kano ka jingtuklar na ka Dominion Government of India. Hangne ruh ngan hab pynkynmaw ïa ka jingthmu ki mynder ri kiba sah ha kine ki jaka European Ward ban pynlong Union Territory ïa ka Shillong, ka rukom pyrkhat kaba la mih naduh ki snem 1947 bad kaba la jan urlong ha ka por ba ngi ïoh ïa ka jylla Meghalaya.
Ka hok jong ka kur Nongkhlaw
Ha ka jingïakhun jong ka Kur Nongkhlaw ha Gauhati High Court la kyntait ban pdiang ïa ka jingujor ka jong ka Kur. Ka Gauhati High Court ha ka jingbishar jong ka ha u snem 1997, wat la ka kashari ka la pdiang ba ki jaka la shu aiwai sha ki Phareng ha u snem 1863, ka ong pat de ba ka Article 363 ka Riti Synshar ka khanglad ban bishar ïa ki kamba la pynbeit hapoh ki jingïateh kular bad ki Khasi States kaba mut ka Instrument of Accession. Ka KHADC ruh ka dang pyrshang ban wanrah biang ïa kine ki jaka shapoh ka jingsynshar la jong. Ka jingpynphai noh khlieh ki jaka sha KHADC ka dei ban long ka mat bahakhmat eh ha ka jingshong bishar halor ka hok bad ka riti ki Khun Hynñiewtrep. Ka jingïakhun jong ka kur Nongkhlaw ka dei ban ïaid shakhmat namar ba ka jingriehtngen hapoh ka Article 363 ka plie lynti ruh ba ïa ka jingïakren halor ka Instrument of Merger lane ka Jutang Pynrung shapoh ka Ri India ka dang sahteng bad lehse ka Supreme Court ka Ri India ka lah ban bishar ïa kane rai halor kane ka mat kaba kongsan bha. Hynrei ka ban biang palat ka dei lada ka Sorkar India ka mynjur ban pynkylla noh ïa ka Para 20 ban wanrah biang ïa kine ki jaka hapoh ka thapniang ka KHADC. Hangne kan plie lad ban ïakren ïa ka hok ki Kur Nongkhlaw bad kiwei kiwei ruh nalor ba ka Jaidbynriew ka ïoh biang ia ki jaka ba lah duh.
Kyntang iawai
Ka jingïakhun halor ka hok ban pynphai noh ïa ki jaka sha KHADC ka dei ban long ka jingïatreilang kaba khlaiñ ban pynshisha ba ka Khyrnit Hynriew ne Sixth Schedule ka dei aiñ ban ïada kyrpang ïa ngi kiba aijait kmie hapoh ka Riti Synshar ka Ri India. Ka Kur Nongkhlaw ka dei ban ïakhun ïa la ka hok. Kumba long mynta ka Sorkar Meghalaya ka shongwai khlem siew bai wai. Kaba ma bad pynsyier ka long ba nalor bai wai khlem siew bai wai la shu ai pathar ba ïa ki mynder ri ba kin ïoh jaka ha Sor Shillong. Hangne nga buh jingkylli-” Hato kat kine ki mynder ba ïoh jaka ha kine ki thaiñ European Ward ki dei kito ki 84,000 ngut kiba don hangne ha u snem 1951 ne ki dei kiba la shu wan rung kyrthep khlem kano-kano ka jingadong? Kum ka jingai jaka sha ki Kharmetor ïa ka jaka ki Kur Nongkhlaw da ki akar ka bym dei kaba khyndiat. Ha kajuh ka por ngi donkam ban long kiba don burom ban burom ïa ka hok tynrai jong ki Kur ki Jait halor ka khyndew ka shyiap kaba dei hok ka jong ki. Ka sorkar Meghalaya ka dei ban pyrkhat sani bha ïa kane bad ïatreilang bad ka KHADC ban pynkylla noh ïa ka Para 20 ka Khyrnit Hynriew jong ka Riti Synshar ka Ri India bad pynphai ka hok ki kur ba la shah knieh ka kyndew kur ka jong kiba dei ka khyndew Trai Ri ka Jaidbynriew.
