Shillong, Nailar 23
Ka Sorkar Jylla Meghalaya ka la kular ban khot jingïalang hapoh ka 10 tarik Nailur 2026 hapdeng ka Sorkar Jylla bad ka Sorkar Assam ban ïakren pynbeit halor ki jingeh ba ki nongniah kali Tourist kiba ki ïakynduh ha kine ki kyndiat sngi.
Ïa kane ka rai la shim ha ka jingïalang ba la khot kyrkieh da u Symbud Myntri Rangbah u Bah Sniawbhalang Dhar kaba la long ha ka sngi u Blei, ha kaba la ïa donlang u Deputy Commissioner, Superintendent of Police ka East Khasi Hills District bad ki nongïalam ka All Khasi Meghalaya Tourist Taxi Association (AKMTTA) ryngkat kiwei de ki synjuk nongniah kali ka Jylla.
Ban shu pynpaw hangne ka AKMTTA haduh ka 23 tarik u Nailar ka dang pakhang bad pynphai lud ïa ki kali Tourist ba na ka Assam ha lad Umroi, da kaba kdew ba ki kali Assam kim dei shuh ban wan ban kamai hapoh ka Jylla Meghalaya.
U Bah Sniawbhalang haba kren sha ki nongthoh khubor hadien ka jingïalang, u la ïathuh ba ka Sorkar bad ki nongniah kali Tourist ki la shim tang da kawei ka rai ba ka Sorkar kan khot ïa ka jingïalang ba yn don ki Commissioner & Secretary Transport jong ka Jylla Assam bad ka Jylla Meghalaya na ka bynta ban ïa pynbeit ïa ki jingeh jong ki nongniah kali Tourist.
“Hapoh ka 10 tarik Nailur ngan khot ïa ka jingïalang jong baroh ar ki tnat Transport kata jong ka Jylla Meghalaya & Assam. Ha kane ka jingïalang yn don lang ki Commissioner ka tnat Transport jong baroh artylli ki Jylla bad ha kane ka jingïalang ngin ïakren halor ki jingeh ba ki nongniah kali Tourist jong ngi, ki kynduh haba ki leit kamai sha ki bynta ka Jylla Assam” la ong u Bah Sniawbhalang.
U Bah Sniawbhalang u la ong ba ka Sorkar ka la sngap bha ïa ki jingeh ba ki nongkamai kali Tourist jong ka Meghalaya kiba la pynsngew ha ka jingïalang bad u la pynthikna ba un rah ïa kine ki jingeh ha ki bor Sorkar ka Jylla Assam.
