Shillong, Nailur 24
Ka ilekshon MLA shiteng samoi ha Gambegre konstitwensi ka lah ban long ka jingtynjuh ïa ka Congress kaba dang dei ban jop biang ban bat ïa kane ka konstitwensi, kumjuh ruh ïa ka National People’s Party (NPP) kaba don ha ka bor synshar kaba hap ïakhun bad hap ïoh jingjop beit lada ka long kumno-kumno khnang ban nang shngaiñ ka jingïaid lynti jong ka ha ka saiñ pyrthei khamtam ka lynti sha u snem 2028.
Ka jingjop ïa ka ilekshon MLA shiteng samoi ha Gambegre konstitwensi kan nang lah ban pynrung ha ka jingmut jingpyrkhat ki paidbah ka Jylla ba ka jingshaniah ïa ka Congress ka dang don.
Kumjuh ruh ïa ka NPP, lada kam lah ban jop ha kane ka ilekshon shiteng samoi, kan don ka jingkylla ha ka rukom pyrkhat da kumwei pat ïa kiba bun khamtam lada ka seng kaba ïalam ïa ka Sorkar kam lah ban jop.
Ka jingjop ka Congress ïa ka ilekshon Lok Sabha na Tura Parliamentary konstitwensi lyngba u Saleng A Sangma ka la long ka jingheh mynsiem sa shisien pat ïa ki nongïalam ha kane ka Jylla kumjuh ruh ïa ki nongtrei jong ka Congress ha Rilum Garo. Ka jingbym lah ka NPP ban jop ha ka ilekshon MP ka pynmih ruh ïa ka jingkylli, balei ki paidbah kim shaniah ïa ka seng kaba ïalam ïa ka Sorkar.
Katkum ki nongpeit pyrman ïa ka saiñ pyrthei ha Jylla, ki la pynkynmaw ïa ka ilekshon shiteng samoi ha Ranikor konstitwensi ha u snem 2018 ha kaba ka NPP ruh ka khlem jop, ka Congress ruh ka khlem jop, hynrei ïa ka jingjop la ïoh pynban u kyrtong ka UDP u Bah Pius Marweiñ.
“Haba peit ïa ka jinglong-jingman ka saiñ hima kumba ka long mynta, ym lah ban batai namar ka ilekshon shiteng samoi ha Gambegre ka lah ban don ka jingïatreilang napoh-napoh hapdeng katto-katne ki seng. Ka jingkylli ka long hato kan long kum ka ilekshon MLA shiteng samoi ha Ranikor konstitwensi?” la ong u nongpeit pyrman.
Ka NPP kan pynïakhun da ka Chandee A Sangma kaba dei ka kurim jong u Myntri Rangbah, katba ka TMC kan pynïakhun da ka MDC ka Sadhiarani Sangma kaba dei ruh ka hep kynsi jong u Nongïalam ka Liang Pyrshah, u Dr Mukul Sangma.
Ka Congress kaba donkam ban jop biang ban bat ïa ka Gambegre konstitwensi kumba la ïoh jingjop u Saleng A Sangma, kam pat pynbna ïano kan sei kyrtong haduh mynta. Ka BJP ruh kam pat sei kyrtong wat lada ka kyrteng u MDC ka Tura u Bernard Marak ka la sawa bha.
