Nongstoiñ, Nailur 24
Ha ka 24 tarik mynta u bnai, ki pulit jong ka thanat Mawshynrut ki la lap ïa ka met ïap jong uwei u briew kaba la sdien phasi ha uwei u dieng ha kawei na ki khlaw ha ka shnong Langdongdai ha West Khasi Hills.
Katkum ka tyllong khubor na ki heh pulit ka District la ïathuh ba ha ka 24 tarik mynta u bnai ha ka por kumba 8 baje mynstep la ïoh jingtip ba la lap ïa uwei u briew ïa uba la tip kyrteng u Prayful Puwein, 20 snem ka rta na ka shnong Langdongdai uba la ïap da kaba shu sdien phasi.
Shuh shuh ka khubor na ki pulit ka ong ruh ba hadien kane, na ka liang ki pulit mar ïa ïoh jingtip, ki la leit mar mar sha katei ka jaka ban pynlong ïa ka jingtohkit ïa katei ka jingjia ha kaba ki la lap ïa ka met ïap jong utei u briew kaba la sdien ha u tyllai phasi ha uwei u dieng ba don ha katei ka khlaw.
Ka khubor ka ïathuh ruh hadien ba la pyndep ïa ki jingdonkam baroh katkum ka aiñ, ïa ka met ïap la pynkit noh sha Riangdo CHC ban pyndep ïa ka ‘postmortem’ bad la pynrung ruh ïa ka mukotduma. Kumta ka jingtohkit ka dang ïaid shakhmat ban lap ïa ka daw bad ki jingshisha baroh halor kane ka jingjia.
