Jowai, Nailur:
Ka seng ki trai trok hapoh ka lama jong ka Jaiñtia Hills Truck Owner Association (JHTOA) ha ka 23 tarik Nailur, ka la sdang ïa ka jingïakhih kaba khlem buh por da kaba pynphai haduh 100 tam ki trok kit mar jong ki karkhana pynmih dewbilat khamtam jong ka Star Cement.
Ha ka jingïakren bad u President ka JHTOA u Bah Biangshwa Shylla u la ong, baroh ki karkhana pynmih dewbilat kiba don ha ka thaiñ East Jaiñtia Hills District khamtam ka karkhana Star Cement kim shym la bud ryntih ïa ka jingïakut ban kit mar kata ka dewbilat bad clinker.
Kumta, u la ong ba ka JHTOA kam banse ban shim ïa kane ka rai ban pynlong da ka jingïakhih namar ka jingbym kheiñ snep kine ki karkhana dewbilat bad pynduh lad ïa ki trai trok trai ri trai muluk ban ïoh kamai na ka kit ka bah.
Shuh shuh u Bah Shylla u la ïathuh ba la dep ban ïakut ban pyllait ïa ki trok jong ka JHTOA, 21 tylli ha ka shisngi ha ka aïom lyiur bad 40 tylli shisngi ha ka aïom tlang hynrei kine ki karkhana na ka por sha ka por ki ïaid lait ïa kane ka jingïakut kaba la dep ban ïa pynbeit bad ïasoi hakhmat ki bor pynïaid district jong ka East Jaiñtia Hills.
Ka jingdawa jong ka JHTOA kam dei kaba heh hynrei la dawa tang kat ban im bad ban pyndap pynbiang ïa ka jingdonkam jong ki khun ki kti bad ka ïing ka sem bad kumba long mynta khamtam une u bnai ka kamai kajih ka hiar namar ka jingleh bym suitñiew jong kine ki karkhana, la ong u Bah Shylla.
