Shillong, Nailur 24
Iwei i heprit ba dang 10 snem ka rta ba shong ba sah ha shnong Thangshalai hajan Mawryngkneng, East Khasi Hills District, i la sdien phasi noh ïalade ha kawei ka kamra na ka daw ba ka hynmen kam shym la ai ban peit mobile namar ka kwah ba in khreh kot bha namar ba i don ‘test’ ha skul.
Kane ka la jia ha ka por 2:30 nohphai sngi jong ka 22 tarik Nailur 2024 ha ïingsah jong ki.
Katkum ka jingïathuh jong ki bahaïing, ha ka Sngi U Blei kane ka heprit ka la pan mobile na ka hynmen ha ka por kumba 2:00 baje eiei nohphai sngi hynrei ka khlem ai namar ba ka phah khreh kot naba don ka test ha skul ha ka 23 tarik mynta u bnai bad mar kumta ka la leit rung ha kamra ban set ïalade. Hynrei, ynda la wan ka para arkmie ka la khot ban ïalehkai, haba kam plie ïa ka jingkhang ka la leit peit na shadien ka jingkhang ïit bad la ïohi ba ka la sdien phasi.
Mar kumta ki la pyrta ïa ki bahaïing bad la shu kyndang ïa ka jingkhang ha ka por 2:30 nohphai sngi.
Shuh shuh ki la ïathuh shwa jong kane ka jingjia, ine i heprit i dang shong kai bad ka kmie ha baranda hynrei i la ïeng na baranda ban leit pan mobile na ka hynmen.
Ki la ïathuh ba ine i heprit i tbit bha ban rwai ha ïingmane bad dei na kata ka daw i kwah ban peit ïa ki jingrwai ha mobile.
Ki la pyntip ruh hadien ba la kyndang ïa ka jingkhang ki la law pynsted ïa u tyllai namar ba ka dang syaid ka met hynrei haba la synreit da ka um, im shym la khie ne kyndit shuh.
Hadien ba la wan ki pulit, na ka liang ki bahaïing ki la pan jingbit ban ym leh ïa ka ‘post mortem’ namar kane ka dei ka jingjia ba leh hi. Kumta ha ka 23 tarik Nailur ki bahaïing ki la ïoh ban tep noh ïa ka met jong itei i heprit ha lum jingtep kaba don ha ka shnong hi.
Haba ïoh ban ïakren bad u Secretary Shnong Thangshalai Bah Iohstar Kharumnuid u la ong, ka jingjia ha Thangshalai ha kaba iwei i heprit i la sdien phasi tang namar ba i khlem ïoh ban bat mobile phone, kan long ka jingsneng ïa ki kmie ki kpa ha baroh ka jylla ba kin long kiba phikir bha haba ki ai bat mobile ïa ki khun haba ki dang rit.
U la ong ba ha jingngeit Khristan, u shim ba u soitan u la sdang ban thombor ïa ka imlang ka sahlang lyngba ki mobile phone bad u la rung sha ki heprit.
U la ong ba ka mobile ka la ktah ïa ki rangbah namar ka la tuh ruh wat ïa ka por haba shisien ba ki la bat bad katno tam ïa ki heprit kiba dang lyngkot ka jingmut jingpyrkhat.
Ha kajuh ka por u la ong ka jingsdien phasi i heprit ha Thangshalai ka la pynkyndit bynriew ïa ka pyrthei baroh kawei.
