Nongpoh, Nailur:
U Bah Marcus Marten, President barim jong ka Hynñiewtrep National Youth Front (HNYF) Northern Region bad uba bat ruh kum u Vice President ha ka Sengkmie, ha ka Lah Sngi U Blei u la shah beh noh na ka seng halor ka jingïaid lait ïa ki riti treikam jong ka seng kaba kum ki Nongïalam kim lah satia ban pdiang.
Ïa kane ka rai la pynpaw paidbah da u Bah Alfred Malai, General Secretary ka HNYF Northern Region haba kren sha ki lad pathai khubor ha Nongpoh ha ka jingïadon ryngkat u President, Bah Heasting Lyngdoh, u Organising Secretary Bah Barna Manih uba bat ruh kum u Adhoc Vice President ka Sengkmie lem bad kiwei kiwei ki dkhot ka HNYF Northern Region.
Halor kane ka bynta, utei u Nongïalam u la kyntu ïa ki dkhot jong ka seng bad ki paidbah ruh kumjuh kiba ju ïadon bynta bad u Bah Marcus Marten ba kim dei shuh ban shim ïa u kum u dkhot jong ka HNYF, namar naduh kane ka sngi um don jingïadei eiei shuh bad ka seng. Lada donkam eiei ruh ki lah ban kynduh pat ïa ki Nongïalam ba thymmai jong ka seng kiba la shah jied bad shah pynskhem ha kine ki khyndiat sngi kiba la dep.
Ha kajuh ka por, utei u Nongïalam u la shim ruh ïa kabu ban ai khublei kyrpang ïa baroh ki dkhot ka seng ba kynthup ruh ïa ki Nongïalam bad nongshah khot sngewbha kiba la wan ban ïa don ryngkat ha ka sngi ban pynskhem ïa ki nongkitkam ba thymmai ka HNYF NR kaba la pynlong ha Umsning ha kine ki khyndiat sngi kiba la dep.
