Shillong, Nailur 24
Ka Sorkar Jylla bad ka Bill & Melinda Gates Foundation (BMGF) ha ka Sngi Ba-ar ki la soi ïa ka soskular ka jingïateh (MoU) ban ïatreilang ha ka ban pynbha ïa ki jingmih na ka koit ka khiah jong ki paidbah ka Jylla, khamtam haba ïadei bad ka koit ka khiah jong ki kmie bad ki khyllung ba dang kha, ka jingpyrkhat ban seng ïa ka longïing, ka jinghikai ïa ki nos, ka rep ka riang bad ki kam pynroi ha ki kam ri ki jingri.
Ïa kane ka soskular la ïasoi ha ka jingdonlang u Myntri Rangbah ka Jylla, u Conrad K. Sangma bad ka Myntri ka tnad ka Koit ka Khiah, Dr. M. Ampareen Lyngdoh, u Director ka India Country Office ha Gates Foundation, u M. Hari Menon nalor kiwei-kiwei.
Ka soskular ba la soi mynta ka sngi ka la khot ban pynurlong ïa ki lad jingsumar kiba paka bad kiba treikam ha ka Jylla, bad ki seng ki la kular ruh ban shim ïa ki kiba bun ki kam ban kynjoh ïa ki thong jong ka ‘United Nations Sustainable Development Goals’, khamtam haba ïadei bad ka thong jong ka koit ka khiah na ka bynta u snem 2030.
Lyngba kane ka soskular, ka BMGF kan ai jingkyrshan ha ka liang ka pisa-tyngka bad ka jingstad ban pynbha ïa ki jingmih ha ki khat-ar tylli ki bynta ba kongsan – ka jingsumar pang ba pura, ka jingpyrkhat ban seng ïa ka longïing, ka koit ka khiah jong ki kmie bad ka jingduna snam, ka jingai dawai injek, ka jinghikai ïa ki nos, ka rep ka riang nalor kiwei-kiwei.
Haba kren ha kane ka jingïasoi, u Myntri Rangbah ka Jylla, u Conrad K. Sangma u la ban jur halor ka jingdonkam jong kane ka jingïatreilang bad ong, “Ngi sngewkmen halor kane ka jingïatreilang kaba ngin sa don bad ka Gates Foundation. Ngi donkam ïa ki briew kiba beit jingmut, ka thong bad ka rukom pyrkhat ban ïashong lang bad pyrshang ban pynbeit ïa ki jingeh, ki jingpynbeit jong ki tnad treikam, bad ki jingthmu kiba ngi don. Na ka bynta jong ngi, kaba kongsan ka long kumno ban pynbha ïa ka jingim jong ki nongshong shnong jong ngi.”
“Ngi la sdang ban saiñdur katkum ki jingeh ba shisha, ki rukom treikam jong ki tnad treikam bad kaei kaba ngi hap leh ban weng ïa ki jingeh. Ngin nang minot shuh-shuh ban pyntikna ba ngi kynjoh ïa ki thong kiba ngi kwah. Kan ym long kaba suk, hynrei ka dei ka jingïaid lynti kaba ïai bteng,” u la ong. Na ka liang ka Myntri ka Koit ka Khiah, ka Dr. M. Ampareen Lyngdoh ka la bynrap, “Ngi sngewkmen shi kat dei ba phi la don lypa ha ka lyngkha la slem bah, kumta phi la tip bha kiei ki jingduna jong ngi, phi la tip bha ïa kaei kaba ngi donkam ban leh.”
