Shillong, Nailur 24
U State President ka All India Trinamool Congress (TMC), Bah Charles Pyngrope ha ka Sngi Ba-ar u la kyntu ïa ka kynhun kaba thmu pynlong ‘Rally’ ha nongbah Shillong ha ka 2 tarik Risaw ban ym ïaid shakhmat bad kane ka kam.
“Ka jingkyntu jong nga ka long ba kim dei ban wan pynlong ïa ka ‘Rally’. Ban wanrah ïa kum kata ka ‘Rally’ kan poi pynban sha kaei-kaei kaba lah ban kham sniew shuh-shuh bad kam bha na bynta ka imlang-sahlang khamtam na bynta ka jaidbynriew jong ngi,” ong u Bah Pyngrope haba jubab halor ka jingsngew jong u haba ïadei bad ka jingthmu pynlong ‘Rally’ jong kawei ka kynhun shit niam ha nongbah Shillong ha ka 2 tarik Risaw mynta u snem.
Katei ka ‘Rally’ ka long shi bynta jong ka ‘Gau Dhwaj Sthapana Bharat Yatra’ – ka jingïalap ha kylleng ka ri ban ïada ïa ki masi, ban khang ïa ka jingshohdoh ïa ki (masi) bad ban kyntiew ïa ka masi sha ka kyrdan jong ka ‘Rashtra Mata’.
Haba kylli, u la ong, “Ha ka jingsngew jong nga, kim dei ban wan ban khang namarba ka Riti Synshar ka Ri ka la ai ïa ngi ka jinglaitluid…ka shong ha u briew.”
“Don ki bym kwah ban bam…ym lei-lei lada kim bam, ka lariti jong ngi pat ka shah, te ngi ïa bam. Hooid, ki don ruh napdeng jong ngi ki bym bam, kum nga ruh ngam ju bam doh masi, kam mut pat ba nga lah ban khang ïa kiwei. Ka shong ha ka jingkwah jong u briew,” ong u Bah Pyngrope.
U la bynrap, “Ngim dei ban wanrah ïa kiba kum kita sha ka Jylla jong ngi lane sha ka Jylla jongno-jongno ruh.”
Ka jingthmu jong katei ka kynhun shit niam ban pynlong ïa ka ‘Rally’ ha ka 2 tarik u Risaw ka la wanrah ïa ka jingpyrshah na kiba bun ki liang ba kynthup na ka Hynñiewtrep Youths’ Council (HYC), Khasi Students’ Union (KSU), Khun Hynñiewtrep National Awakening Movement (KHNAM), Voice of the People Party (VPP), Khasi Hills Autonomous District Council (KHADC) nalor kiwei-kiwei.
