Shillong, Nailur 25
Ka Sorkar Jylla ka la thaw ïa ka Committee kaba khlieh da u Director ka tnat Jngohkai na ka bynta ban ïakren halor ki mat kiba la wanrah da ka kynhun ki nongñiah tourist taksi ha kaba ïadei bad ka jingkit ïa ki nongjngohkai kiba wan sha kane ka Jylla.
Ïa kane la ïathuh da u Myntri Rangbah u Conrad K Sangma haba kylli shaphang ka jingpynsngew jong ka All Khasi Meghalaya Tourist Taxi Association (AKM TTA) sha u kaba la dawa ban don ka jingpyrkhing ïa ki kali kiba nabar kiba kamai ban kit ïa ki nongjngohkai kiba leit sha kylleng ki jaka jngohkai.
U Conrad u la ong ba u la bthah ïa u Director ka tnat Jngohkai ban thaw kawei ka Committee ka ban donlang ki dkhot na ka tnat jngohkai, ka tnat aiñ, ka tnat pulit, ki bor district nalor ka kynhun ki nongñiah kali tourist na ka bynta ban ïakren kham bniah ha kaba ïadei bad ki jingpynsngew jong ki.
U Myntri Rangbah u kyrmen ba ka Committee kan sa ïakynduh ïa ki dkhot khamtam eh bad ka kynhun ki nongñiah tourist taksi ban ïoh ïakren kham bniah bad hadien kata, ka Committee kan sa phah kham kloi ki jingai jingmut sha ka Sorkar.
Haba kylli shaphang ka jingthmu ka kynhun kaba kheiñ kmie ïa ka masi ban wan pynlong jingïalang ha ka 2 tarik u Risaw, u Conrad u la ong ba ka India ka dei ka ri kaba ai laitluid ha ka jingngeit niam bad ka Sorkar India kam pyrkhing ïa ka rukom bam bad ka jingmlien ban bam ïa ki jingbam kiba kumno.
U la ong ba haba ïadei bad ka jingai jingbit, ki bor district ki don ka bor ban rai namar wat u Myntri Rangbah lada ka seng saiñ kaba u don ka donkam ban pynlong kano-kano ka jingïalang paidbah, u hap ban ïoh jingbit shwa na ki bor pynïaid district.
