Shillong, Nailur 25
Ban tehlakam ïa ka jingkamai kali laitluid jong ki briew kiba dei ki bar jylla khlem ki kot ki sla kiba biang, ka Synjuk ki Nongñiah Taksi Sor bad Khapsor ha ryngkat bad ki pulit Enforcement jong ka Khasi Hills Autonomous District Council (KHADC) ha ka 25 tarik u Nailur 2024, ka la pynlong ïa ka jingkhynra Labour License na ki nongñiah kali kamai ha kylleng ka nongbah kaba kynthup ha Rynjah, Nongmensong, Dhankheti, Laitumkhrah bad ha Happy Valley.
Ha katei ka jingkhynra la lap ba ki bar jylla kiba ñiah kali kamai kim don satia ïa ka Labour License ha kaba la lap ruh ba ki trai jong kitei ki kali ki dei ki trai jylla kiba la ai wai pat sha u bar jylla ban kamai.
Na ka liang u Bah Pynsuk Yuroi, General Secretary ka Synjuk, u la ong ba ka jingpynlong ka Synjuk ïa ka jingtalasi ha katei ka sngi ka dei namar la ïohi ba ki la don shibun ki bar jylla kiba la kamai beaiñ khlem ka jingdon ïa ka Labour License. Ha kane ka jingkhynra la lap ruh ba u draibar taksi uba dei u bar jylla uba la kamai kali la 12-13 snem eiei um don satia ïa ka Labour License.
“Ka mut um kheiñ snep ïa ka District Council ba ka don bad ka District Council ruh imat baroh shikatto kam shimkhia ban pynbor ïa ki ba kin leh ïa ka Labour License”, ong u Bah Yuroi.
U Bah Yuroi u la ïathuh ba tang ha ka jingkhynra hapoh Rynjah, ka Synjuk ka la ïoh ban bat haduh 40 tylli eiei ki kali kiba la kamai da ki bar jylla ki bym don satia ïa ki kot ki sla kiba biang bad ong ba lada kheiñ sa sha kiwei pat ki jaka, ka lah ban tam da ki spah tylli ki kali ki bym biang ïa ki kot ki sla. Shuh-shuh u Bah Yuroi u la ong ba ha katei ka jingkhynra, ka Synjuk ka lah dep ban shim lut ïa baroh ki kyrteng jong ki bar jylla ki bym don ïa kot ki sla kali kiba biang ban kamai ha ryngkat ki nombar kali ha ryngkat ka jingmaham ba lada kim don ïa ka Labour License kaba biang, kim bit satia ban dang kamai.
U Bah Youroi u la ong ba lada ka Synjuk ka lap biang ba kine ki bar jylla kim don ïa ki kot ki sla kiba biang, ka Synjuk kan sa rah biang ïa ki kyrteng jong kitei ki draibar bar jylla sha KHADC bad lada ka KHADC kam leh eiei halor kane ka bynta, na ka liang ka Synjuk kam banse ban shim noh sa da kiwei pat ki sienjam.
“Lada ngi lap ba kine ki kali ki dang kamai bad ïaid sharum-shaneng bad ba kine ki draibar kim biang ïa ka Labour License, na ka liang jong ngi ngin sa leh eiei da kaba ngin rah biang ïa kine ki kyrteng sha ka KHADC ba ki lah pynkheiñ ïa ki kyndon aiñ jong ka KHADC bad lada ka KHADC kam shimkhia halor kane, ngin sa shim noh da kiwei ki sienjam”, bynrap u Bah Youroi.
U Bah Youroi u la buh ka jingmaham ruh ïa ki trai jylla kiba buh draibar da ki bar jylla ba haba ki ai kamai kali da ki bar jylla, ki dei ban pynbiang ïa ka Labour License na ka bynta ki draibar jong ki bad na ka liang ka Synjuk ruh kan ym shim satia ïa ka jingbah khlieh lada jia kano-kano ka jingjia. Da kaba kynnoh ruh ba kane ka jingïoh kamai laitlan ki bar jylla khlem da pynbiang ïa ki kot ki sla kiba biang ka dei namar ka jingkheiñ sting jong ki trai jylla kiba ai kamai da u bar jylla kiba khlem pynbiang ïa ka Labour License. Sa kawei pat ka daw ka dei namar ba na ka liang ka KHADC kam pynlong satia ïa ka jingkhynra ïa kitei ki kali na ka por sha ka por bad ka dei tad haduh ynda na ka liang ka Synjuk ka la banjur ïa ka KHADC ban pynlong ïa ka jingkhynra ba kane ka kam sa urlong.
“Ngi ngeit skhem ba kane kan dei ka jingpynkyndit bynriew ïa ka Council ba nangne shakhmat kum kine ki sienjam ki dei ban don na ka por sha ka por”, bynrap u Bah Youroi.
