Shillong, Nailur 25
U State President ka All India Trinamool Congress (TMC), Bah Charles Pyngrope u la ong ba ka seng ka la ïaid shaid-shaid bad ki jingpynkhreh haba ïadei bad ka ilekshon shiteng samoi ka ban sa long ha Gambegre.
“Haduh mynta ki jingpynkhreh ki la nang ïaid wat la ngam pat ïoh leit shathie. Na ka liang ki nongkitkam jong ngi ha Ri-lum Garo ki la ïaid shaid-shaid bad ki kam,” ong u Bah Pyngrope.
Ha kajuh ka por, u la pynpaw ka jingsngew skhem ïa ka kyrtong ka seng (ka ban aireng ha ka ilekshon shiteng samoi) khamtam ba ka dei ruh ka MDC bad kaba la ju trei bha na bynta ki paidbah.
Hashuwa, ki bor ba halor jong ka TMC ki la ai jingmynjur ïa ka kyrteng ka Sadhiarani M. Sangma ban long ka kyrtong ka seng ha ka ilekshon shiteng samoi ka ban long ha Gambegre.
Ka Sangma kaba dei ka MDC ha Garo Hills Autonomous District Council (GHADC), ka dei ruh ka kurim jong u nongmihkhmat barim ka Rangsakona konstitnwensi, u Zenith M. Sangma bad ka la ïakhun arsien na Gambegre konstitwensi hynrei ka la shah rem noh tang da khyndiat ‘vote’.
Kane ka nongmihkhmat ka GHADC na Dengnakpara konstitwensi ka la ïakhun ruh ha ka ilekshon sha ka ïingdorbar thawaiñ ka Jylla ha u snem ba la dep na Gambegre konstitwensi pyrshah ïa u Saleng Sangma bad shah rem noh da 2,871 ‘vote’.
U Saleng u la ïoh 11,252 ‘vote’ katba ka Sadhiarani ka la ïoh 8,381 ‘vote’. U kyrtong ka NPP, u Rakesh Sangma u la ïoh 7,628 ‘vote’.
Kum ban shu kdew hangne, ka konstitwensi Gambegre ka la sah thylli namar ka jingieh noh kam jong u MLA ka Congress, u Saleng A. Sangma ha ka 10 tarik Jylliew mynta u snem hadien ba u la shah jied kum u MP ka Tura Parliamentary konstitwensi ha ka ilekshon ba la dep sha ka Lok Sabha.
Hynrei kumba ka long, ka Election Commission of India (ECI) kam pat pynbna ïa ka tarik na bynta ban pynlong ïa ka ilekshon shiteng samoi ha Gambegre.
Ïa kane ka ilekshon shiteng samoi hap ban pynlong hapoh 6 bnai bad kumta ka lah ban long ha kano-kano ka por mynta u snem.
