Na ka DGCA hap ïoh jingmynjur ban ym ot ïa ki lum rit bad pynheh ïa ka kad liengsuiñ ha Umroi

Shillong, Nailur 25

Ka jingthmu ban pynheh ïa ka kad liengsuiñ ha Umroi khamtam ban pynjrong shuh shuh ïa ka surok kaba mareh ki liengsuiñ lane ‘runway’ na ka bynta ban wan ki liengsuiñ kiba heh ka lah ban kham shimpor. Kane ka long namar ba ka Sorkar Jylla ha ryngkat ka Airport Authority of India ka dang donkam ban ïoh jingmynjur shwa na ka Directorate General of Civil Aviation (DGCA) shwa ban ïaid shakhmat.

Ïa kane la ïathuh da u Myntri Rangbah u Conrad K Sangma hadien ba la ïohi ïa ki jingpynkhreh kiba kham bniah halor ka jingthmu ban pynheh ïa ka kad liengsuiñ ha Umroi khnang ba ki liengsuiñ kiba heh kum ka Boeing 737 ka lah ban wan ha ki por ban sa wan.

U la ong ba kane ka jingbatai kaba bniah halor ka jingpynheh ïa ka Kad Liengsuiñ ka dei hadien ba la dep ka jingpule bniah ïa ki jingdonkam ha kane ka kad liengsuiñ bad la leh ïa kane ha ryngkat bad Airport Authority of India.

U la ong ba katkum kane ka jingpynkhreh, ym donkam shuh ban ot ïa ki lum rit kiba don sawdong ka lad liengsuiñ hynrei donkam ban pynheh ïa ka kad liengsuiñ da ka shim jaka shuh bad pynjrong ïa ka surok ban mareh ki liengsuiñ lane runway.

Ka Kad Liengsuiñ ha Umroi ka donkam ban pynjrong sa 751 metre ka runway bad ka donkam ruh kumba 6 Akar ka jaka ban pynïeng ïa ki liengsuiñ.

U Conrad u la ong ba ïa kine ki jingpynkhreh baroh ban pynheh ïa ka kad liengsuiñ donkam ban ïoh jingmynjur shwa na ka tnat liengsuiñ ka Sorkar Pdeng khamtam na DGCA.

Haba kylli halor ka jingeh ban ïoh jaka sa 22 Akar ban pynheh ïa ka kad liengsuiñ, u Conrad u la ong ba kane ka jingtei jingshna ban shna pynheh ka dei ka jingmyntoi ïa baroh bad donkam ka jingïatreilang.

“Kane ka jingpynkhreh kaba mynta ka dei kaba kham duna ka jinglut ym kum mynshwa ha kaba ka jinglut kan kot sha ka T.7,000 ne T.8,000 klur hynrei mynta ka dei ka jinglut kaba duna bha namar ïa ki lum rit ym donkam shuh ban ot,” u la ong.

U la ong ruh ba katkum ka jingpynkhreh kaba mynshwa donkam ban ot ïa ki lum rit kiba don sawdong ka lad liengsuiñ bad dei hadien ba la ot ïa ki lum ba ki liengsuiñ ki la lah ban hiar mynta bad ban her na kane ka kad liengsuiñ.

Namar kata, u kyrmen ba ka DGCA kan ai jingmynjur ïa kine ki jingpynkhreh ha kaba ka donkam ban ai ka kynja laisen ban ïaid shakhmat ïa ki kam.