Ngi suba ba i heprit bad longkmie ki shah pynïap, buddien ki bahaïing bad ka shnong

Katkum ka jingïohlum jingtip, ka Kong Niensidalin ka dei kaba sah marjan bad ka kmie jong ine i heprit ha Mawïong Umjapung.

Shillong, Nailur 25

Ki bahaïing jong i heprit ba dang 5 snem ka rta bad ka ïing ka sem jong ka Kong Niensidalin Riahtam ba 45 snem ka rta ryngkat ka jingïatreilang bad ka shnong Mawïong Umjapung kin buddien beit ban lap ïa ka jingshisha namar ki suba jur ba kine baroh ar ngut ki lah ban shah pynïap naba ïa ka met jong ki la lap najan ka jingkieng jong ka wah kaba don hadien jong ka NEHU.

Kane ka jingbuddien ki bahaïing bad ka shnong ka long ba ka aiñ kan thwet ïa ki briew kiba donkti hadien ba ki la suba ïa ka rukom lap ïa ka metïap jong ki na ka wah kaba don hadien jong ka NEHU.        

Kum ban shu pynkynmaw ïa ka metïap jong ka Kong Niensidalin Riahtam bad i heprit la lap da ki khynnah kiba leit sum ha katei ka wah ha ka 19 tarik mynta u bnai hadien ba kim shym la wan phai ïing naduh ba ki la mih na la ïing ha ka step jong ka 18 tarik mynta u bnai.

Katkum ka jingïohlum jingtip, ka Kong Niensidalin ka dei kaba sah marjan bad ka kmie jong ine i heprit ha Mawïong Umjapung. Ha ka 18 tarik mynta u bnai ka la ïalam kai ïa itei i heprit ba dang 5 snem hynrei haba kim shym la wanphai ïing shuh haduh 9 baje mynmiet na ka liang ki bahaïing jong kine ar tylli ki longïing ki la sdang leit wad bad pyntip ruh sha ka shnong.

Ban buddien halor katei ka jingïap jong kitei ar ngut, U Nongsaiñ Hima u la ïoh ban leit ïakynduh ïa ki bahaïing jong i heprit bad bahaïing jong ka Kong Niensidalin hadien lai sngi ba la dep tep ïa ki bad pynpaw ba kin buddien ïa kane ka jingïap jong kine ar ngut namar ki don ka jingsuba ïa ka rukom ïap ka jong ki.

Haba pyrshang ban ïakren bad u Rangbah Shnong ka Mawïong Umjapung lyngba ka phone u Bah H Dohtdong, u la ïathuh ba na ka liang ka shnong, ka dong, ki bahaïing jong kitei kiba la khlad, ki la leit ïakynduh ïa u Officer in-Charge ka thanat Mawlai.

U la ïathuh ba ha kane ka jingïakynduh, u OC u la ong ba kin hap ap shwa ïa ka kaiphod jong ka postmortem na NEIGRIHMS ka ban sa ïoh hadien ar taïew.

U la pyntip ruh ba kum ka shnong bad ki bahaïing kin wad beit ïa ka jingshisha halor kane ka jingshah ïap jong kine ar ngut.