Nongstoiñ, Nailur:
Ha ka 24 tarik u Nailur, 2024, ka Nongstoiñ College ka la rakhe ïa ka sngi Graduation Day ha kaba la pynkup burom ïa ki 440 ngut samla pule, kynthup 383 ngut na ka Arts Stream, 41 ngut na ka Science bad 16 ngut na ka Commerce Stream bad u Chief Secretary ka Sorkar Meghalaya, u Bah DP Wahlang u la long kum u Kongsan.
Ha katei ka jingrakhe, ka kolej ka la ïoh ruh ban pynkup burom kyrpang ïa ki lai ngut samla pule kiba dei ki merit holders na ka kolej kiba kynthup ïa u Bah Shembhalang Kharsyntiew uba la wan ha ka kyrdan ba hynñiew ha ka Zoology (7th Position), Kong Habaphilari Kharbani kaba la wan ha ka kyrdan ba phra ha ka Geography (8th position) bad Kong Larihun L Rngaid kaba la wan ha ka kyrdan ba khyndai (9th Position) ha ka Biochemistry. Kumjuh ruh la ai ïa ka jingithuh ïa ki nonghikai jong kine ki lai tylli ki subject kiba la ïarap ban kyntiew ïa ki samla pule ba kin ïoh ïa kine ki jingjop. Shuh shuh ha katei ka sngi la ai burom ruh da ki memento bad syrnot sha baroh ki samla pule kiba la pyndep ïa ka graduates jong ka batch 2024 ha ka Arts, Science, bad Commerce streams.
U Bah D.P Wahlang haba kren kum u kongsan u la pynpaw ïa ka jingkordor jong kane ka sngi na ka bynta ka kolej bad khamtam ïa ki samla pule ba la pyndep ïa ka jingpule. U la ïaroh ruh ïa ki nonghikai bad ki dkhot ka faculty kiba la trei shitom ban ai jinghikai ba paka ïa ki samla pule ban kyntiew ïa ka jingnang jingstad jong ki.
U Bah DP Wahlang u pynpaw ruh da kaba ong, “Phi don ïa ka jingkyrmen ban long ka jingshai na ka bynta ban kyntiew shajrong ïa ka jylla ha ki liang baroh kata lada phi jied ban trei ïa ki kam ha ka Sorkar, ka kamai kajih, ka pule puthi, ka kam shakri paidbah ne ha kano kano ka bynta. Haba phi sdang ïa kane ka sienjam ba thymmai, kynmaw ba ïa ka jingjop jong phi, yn thew ïa ka, ym tang da ka burom ba phi ïoh, hynrei da ka jingleh babha kaba phi ïarap lem na ka bynta kiwei de.” U la ong ruh, “Mynta ka sngi ngi rakhe ïa kane ka sngi, ym tang na ka bynta ka jingjop jong phi ha ka jingpule, hynrei na ka bynta ka jingjop jong phi ïa ki jingïaleh ha ka jingim bad ka jingnang roi nangsan ha ka jingnang jingtip.”
U la ai khublei ruh ïa baroh ki samla pule kiba la kynjoh ïa kane ka thong bad u la pynpaw ka jingïaroh ïa ki kmie ki kpa bad ki nonghikai kiba la ai jingkyrshan bad ïalam lynti ïa ki. Ha katei ka sngi nalor u kongsan, la donlang ruh u Bah Macmillan Byrsat, MLA barim jong ka Nongstoiñ, uba dei ruh u Chairman jong ka Governing Body jong ka College, Dr. LL Mawsor, President ka Sponsoring Body, u Additional Deputy Commissioner ka WKH u Bah HK Thabah, u Superintendent of Police WKH, u BD Marak, ka Principal jong ka Nongstoiñ College Dr. (Mrs) Ïaisan Mawthoh, ki nonghikai, ki samla pule bad kiwei kiwei.
