
Shillong, Nailur 25
Ki runar bym lah ban ithuh ki dei kiei ki la ïoh ban rong tuh ïa ki ‘battery’ jong ki mobile tower kiba la shong dor da ki lak tyngka.
Katkum ka khubor kaba la ïoh na ki pulit la ong ba u Luish R Marak u la ujor ba ha ka step jong ka 19 tarik mynta u bnai ha ka por kumba 8.30 eiei, u la lap ba ki runar ki la tuh ïa arphew saw tylli ki ‘batteries’ kiba shong dor haduh kumba T.2.5 lak na kawei ka jaka pynïeng tower kaba don ha Romagal Dadenggre ha West Garo Hills.
Ha kawei pat ka khubor na ki pulit, la ong ba u Tengban Ch Sangma u la ai ka jingujor ba ha ka 19 tarik mynta u bnai ha ka por kumba 3 baje janmiet uwei u briew ba la tip kyrteng kum u Ali Chand (37 snem), u la tuh ïa ki lai tylli ‘battery’ na ka Indus Mobile Tower kaba don ha Chandmary, Tura ha West Garo Hills.
Shuh shuh la ong ba hadien ka jingshah beh ha ki paidbah, une u briew uba la shah kynnoh, u la ieh noh ïa kine ‘battery’ bad ban phet krad na kane ka jaka. Hynrei ha ka 21 tarik mynta u bnai pat, ki nongshong shnong jong kane ka thaiñ ki la ïoh bat noh ïa utei u briew na katei kajuh ka jaka ba u la tuh ïa ki ‘battery’.