Shillong, Nailur 25
Ar ngut ki briew ki la shah shoh ha ki briew bym lah ban ithuh ki dei kiei ha ka miet jong ka 22 tarik mynta u bnai ha phyllaw jong ka Civil Hospital Shillong.
Katkum ka khubor kaba la ïoh na ki pulit la ong ba ha ka miet jong ka 22 tarik mynta u bnai ha ka por kumba 10.30 eiei, ki briew bym lah ban ithuh ki la shoh la dat ïa ar ngut ki briew ba kynthup ïa u Sambhalang Nongbri (25 snem) bad u Larikupar Umiap (28 snem), ha phyllaw jong katei ka hospital bad phet krad pat hadien ba la dep ban shoh.
La ong ba kine ar ngut ki briew kiba la shah shoh ki la mynsaw malu-mala bad la pynkit noh ïa ki ha katei ka hospital ban pynïoh ïa ka jingsumar.
Ha kawei pat ka jingjia kaba la jia ha West Garo Hills, katkum ka khubor ba la ïoh na ki pulit, la ong ba ka la don ka jingïaujor kaba la shu ai tang da ka ktien kaba long markylliang hapdeng ki arliang mamla.
Katkum kane ka jingujor kaba la shu ujor tang da ka ktien sha ki pulit, la ong ba ha ka 20 tarik mynta u bnai, ka Josna Banu kaba na Kasaripara ha WGH ka la ujor ha thanat Hallidayganj ba ar ngut ki briew ki la shoh ïa ka ha kawei na ki jaka kaba dang hap hapoh jong kane ka thanat bad ha kaba ka la mynsaw bad la pynkit ïa ka sha CH Hatsingimari ha Assam.
Ha kane kajuh ka sngi, lai ngut kiwei ki briew ki la ai ka jingujor kaba long tang da ka ktien sha thanat Hallidayganj ba ki dkhot na ka ïing jong ka Josna Banu (24 snem), ki la shoh ïa ki ha kawei na ki jaka kaba hap hapoh ka thanat Hallidayganj bad ha kaba ki la mynsaw bad pynkynriah ïa ki sha CH Hatsingimari ha Assam.
