Shillong, Nailur 25
Ka jingnang kynrei jong ki kam tuh kam thiem ka la nang jia na kawei ka sngi sha kawei pat. Ha kine ki sngi ba la dep ka la don biang ka jingshah tuh jong ki ar shaka bad ka jingshah kyndang ka dukan ha ki runar bym lah ban ithuh.
Katkum ka khubor na ki pulit la ong ba u Synshar Khymdait u la ujor ba ha ka 21 tarik mynta u bnai ha ka por kumba 10.30 mynmiet, ki runar bym lah ban ithuh ki la ïoh ban tuh ïa ka ar shaka ka jong u kaba don ïa u nombor ML05-Y-7285 kaba la pynïeng harud surok kaba don hajan jong ka Civil Hospital, Shillong.
Ha kawei pat ka khubor, u Gamjin K Sangma u la ujor sha ki pulit ba ha ka step jong ka 20 tarik mynta u bnai, ki runar bym lah ban ithuh ki la tuh ïa ka ar shaka ka jong u kaba don ïa u nombor ML08-H-2607 na Rongkhon Rongandi Road, Tura ha West Garo Hills.
Kumjuh ruh u Bruce D Marak u la ujor sha ki pulit ba ha ka step jong ka 20 tarik, ki runar bym lah ban ithuh ki la tuh ïa ka ar shaka jong u kaba don ïa u nombor ML08-K-3088 na Chasingre, Tura ha West Garo Hills.
U Abul Kalam ruh u la ujor sha ki pulit ba ha ka 21 tarik mynta u bnai, u la lap ba ka ar shaka kaba don ïa u nombor AS17-A-7022, la lap ba ka la jah na ka jaka ba la pynïeng ha Hawakhana, Tura ha West Garo Hills.
Ha kawei pat ka khubor na ki pulit la ong ba ka Kiran Devi ka la ujor ba ha ka 21 tarik mynta u bnai ha ka por step phyrngab kata 3 baje eiei, ki runar bym lah ban ithuh ki dei kiei ki la prong jubor shapoh ka dukan jong ka kaba don ha Sixth Furlong, Shillong bad ban tuh ïa ki tiar marbam kiba shongdor kumba T.15,000 lem bad ka pisa kaba long T.3,000.
