Shillong, Nailur 25
Ka kynhun jong ka Shiromani Gurdwara Prabandhak Committee (SGPC) bad ka Save Shillong Sikh kiba dei na Amritsar, Punjab, ki la pynpaw ba ki la wan ban ïarap ïa ka Sorkar Meghalaya ban wad ïa ka lad kaba ïa mynjur lang ha kaba ïadei bad ka jingthmu ban pynkynriah noh ïa ki 342 tylli longïing na Them Ïew Mawlong.
Kine ki dkhot jong ka SGPC ryngkat ka Save Shillong Sikh ki la wan sha Shillong ban ïadon bynta ha ka jingïalang ba la khot pynlong da u Chief Secretary ka Jylla u Bah Donald Philips Wahlang ban ïakren ïa kane ka jingthmu ban pynkynriah ha ryngkat ki dkhot ka Harijan Panchayat Committee (HPC), ha Main Secretariat ha ka Sngi Balang.
U Convener ka Save Shillong Sikhs (SSS) u Jagmohan Singh uba la synran ïa ka kynhun jong ka SGPC, u la ïathuh ha ki nongthoh khubor ba kim shym la wan shane ban pynmih ne wanrah ïa ka jingkulmar. U la ban jur ba ki don lang ban ïarap ïa ka Sorkar Meghalaya ban weng ïa ka jingeh ha ka rukom kaba suk bad kaba biang. U Singh u la kdew ba ki wan na Punjab namar ba ka mat ka dei shaphang ki jaidbynriew Sikh kiba la wan buhai shnong 200 snem mynshwa na Punjab sha Meghalaya bad ka SGPC ka la wan ban pynpaw ïa ka jingsngewlem bad ki.
U la pynpaw ïa ka jingïatylli bad ki briew kiba shah ktah, da kaba pynpaw ba ka pynsngewsih ïa ki ban ïohi ïa ka jaidbynriew jong ki kaba don ha ka jingeh.
U Singh u la bynrap ba namar ba ka jingïakren ka dang don ha ka por ba sdang, kim pat lah ban ïasam ïa ki jingtip ba bniah hynrei u la batai ba ka jingïalang ka long kaba tei. U la pynpaw ka jingkyrmen ba ïa kane ka mat kaba ïadei bad ki nongshong shnong ka Punjabi Lane shen yn sa lah ban pynbeit. Haba jubab ïa ka jingkylli, u la kdew ba ka jingtyrwa jong ka Sorkar kam long kaba biang lut bad ha kaba ki la pynpaw ïa katto-katne ki jingeh kiba dang don ha ka jingïakren. U la pynpaw ruh ïa ka jingshaniah ha kaba yn sa lah ban wad ïa ka lad kaba bha. Kham mynshwa, u Symbud Myntri Rangbah ka Jylla u Bah Sniawbhalang Dhar u la pynpaw ba ka jingïalang ba la khot da u Chief Secretary yn sa pynlong ha kaba kut jong une u bnai ban shim ïa ka rai kaba khatduh halor ka jingpynkynriah ïa ki 342 tylli ki longïing kiba sah ha Them Ïew Mawlong.
