Shillong, Nailur 26
U MP ka Rajya Sabha u Dr WR Kharlukhi u la thoh shithi sha u Myntri Rangbah u Conrad K Sangma bad u la dawa na ka Sorkar Jylla ban thung da ka jingtohkit kaba laitluid ban lap ïa ki jingshisha namar la shu kynnoh kyllum ïa ka Meghalaya Public Ser-vice Commission lane MPSC ba ka dei kaba lehthok ne kaba tuh.
Haba kren sha ki lad pathai khubor ha ka Sngi Palei, u Dr Kharlukhi uba dei ruh u nongïalam ka NPP, u la ong ba ka jingjia ha MPSC ka la ktah lang ïa u bad ka ïing ka sem namar ka kurim jong u ruh ka long ka dkhot jong ka MPSC khamtam haba la shu kynnoh kyllum lut ïa ka MPSC baroh kawei.
Kumta u la ong ba u la dawa na ka Sorkar Jylla ban thung da ka Judicial Inquiry ban tohkit laitluid khnang ban lap la ka don shisha ka jinglehthok bad lada ka don mano kita kiba donkti ban lehthok namar ba ka MPSC baroh kawei ka la shah kynnoh lehthok ha ka jingpynlong ïa ka eksamin.
Une u MP ka Rajya Sabha u ong ruh ba lada jia ba ka jingtohkit ka lap ba ka kurim jong u kaba long ka dkhot ka MPSC ka donbynta, ma ruh un iehnoh kam shisyndon kum u MP ka Jylla.
Namarkata, u Dr Kharlukhi u la ong ba ym sngew ïahap satia ban shu kynnoh tih kynnoh lehthok kyllum ïa baroh la ka dei ïa ka MPSC lane ïa ka Sorkar, hynrei dei ban kdew thik ïa kiba donkti ban tuh ne lehthok namar ha ka Sorkar ne MPSC ki don ki briew kiba don hangto bad haba kynnoh dei ban kdew kti ïa kita ki briew kiba don hangto.
