Shillong, Nailur 26
Hadien ka jingkyntait war jong u Myntri Rangbah ka Jylla, u Conrad K Sangma lyngba ki lad pathai khubor ha kaba u la ong ba ka Sorkar Jylla kam don bynta satia ban aibor ne ai ïa ka No Objection Certificate (NOC) na ka bynta ban pynlong ïa kino-kino ki ‘rally’ ne ki jingïaid paidbah ha ka Jylla bad u la ong ba ïa ka jingaibor, ka shong ha ki kti jong ka bor District ban shim ïa ka rai ban ai ne ban kyntait. Halor kane ka jingthet-kti jong u Myntri Rangbah ka Jylla ban khynñiat ïa kane ka jingaibor sha ka shlem treikam ka DC, na ka liang ka Hynñiewtrep Integrated Territorial Organization (HITO) Sengkmie ka la ong ba kane ka jingkren jong u Myntri Rangbah ka la pynlyngngoh ngaiñ bad pynkyndit ïa ki paidbah ka Jylla bad ïa ka seng hi baroh kawei.
Na ka liang u General Secretary ka HITO, Bah Wanbun N Dkhar, u la ong ba ha ka rukom synshar paidbah ka la kdew shai ba u Myntri Rangbah u dei u khlieh duh ban pynïaid ïa ka bor synshar, ka jingthaw ïa ki polisi, ban pynïaid ïa ka kynhun Myntri bad la kdew ruh ba u Myntri Rangbah u pynïaid ïa ka bor synshar lyngba ki Myntri bad ki IAS Officer hynrei katkum ba la paw ha ki lad pathai khubor pat, ka jingong jong u Myntri Rangbah ba ka bor distrik ka don ïa ka bor ban shim ïa ka rai ha ka ban ai ïa kino-kino ki NOC ka long kaei-kaei kaba bakla jur.
“Kane ka dei kaei-kaei kaba u Myntri Rangbah u pyrshang ban da rapjot lane u pyrshang ban pynthame ban thet kti ïalade halor ka bynta kaba u ong ba ka Sorkar Jylla kam don bynta eiei ha ka ban ai ïa kino-kino ki NOC sha ka kynhun ban pynlong ïa ki jingïalang kjat kjat bad kiwei-kiwei”, ong u Bah Dkhar.
Na ka liang u Myntri Rangbah u la pynkynmaw ruh ba ha ki snem ba la dep kata ha u snem 2008 wat ka seng NPP ka la shah pynduh ïa ka NOC ban pynlong ïa ka jingïaid paidbah ha West Garo Hills. Na ka liang ka seng ka la ong ba u Myntri Rangbah u la klet pat ba ha ka por ilekshon, ka bor ban pynïaid ïa ka ilekshon ka shong ha ki kti jong ka Election Commission of India (ECI), ka State Election bad ha u Returning Officer hynrei hadien ba la dep ban thaw pat ïa ka sorkar, u Myntri Rangbah u dei u khlieh duh jong ka Jylla ha ryngkat ki Myntri jong u ha ka ban shim ïa ka rai ban pynmih ïa kino-kino ki rai ba la shim da ka Sorkar Jylla.
Namar kata, na ka liang ka seng kam lah satia ban pdiang ïa ki jingkren jong u Myntri Rangbah bad ong ba kane ka jingkren jong u lehse, ka don eiei sha lyndet namar kane ka mih tang hadien ba na ka liang ka kynhun ki ‘riewngeit Hindu ki thmu ban pynlong ïa ka jingïaid paidbah ban pyrshah bam doh masi ïa kaba la thmu ban pynlong ha ka 2 tarik u Risaw 2024.
“Kane ka jingkren khyllung-khynnah jong u Myntri Rangbah ka pawshai ba um pat kotbor ban bat ïa ka shuki ba la bynshet ha u bad ka don eiei sha lyndet. Ngi na ka liang ka seng ngi pynrem jur ïa kane ka jingkren khynnah-khyllung jong u bad ka pawshai ba u shah ïalam bakla hano-re-hano da ki briew kiba nabar”, la bynrap u Bah Dkhar.
Ka seng ka la kdew ruh ba ha ka 29 tarik u Naitung 2021, ka seng BJP Meghalaya lyngba u State President jong ka, ka la pan ïa ka jingbit ban pynlong jingïalang paidbah halor ka jingwan u MP ka Rajya Sabha bad ïa ka jingbit la ai da u Deputy Secretary ka Jylla jong ka tnad Home (Political) ym da ki bor ka distrik bad ha ka shithi ai jingbit la kdew shai ruh kumne, ‘That the government has granted the permission for holding a public meeting’ kaba mut ba ‘la aibor da ka Sorkar Jylla ban pynlong ïa ka jingïalang paidbah’ ym kumba la thet-kti da u Myntri Rangbah ha ki lad pathai khubor ba la leh da ki bor district. Kane ka long kaba bakla shaba palat bad kane ka kdew shai ba u Myntri Rangbah um pat da sngewthuh shai bha ïa ka bor bad ka iktiar jong u.
