Shillong, Nailur 26
Ka AYUSH Medical Association of Meghalaya (AMAM), ha ka 23 tarik u Nailur 2024, ka la leit ban ïakynduh ïa ka Myntri ka tnat ka koit ka khiah ka Sorkar Jylla, ka Dr. Mazel Ampareen Lyngdoh ha Secretariat halor ki jingeh kiba bun kiba kum ka synjuk ka mad.
Ha katei ka jingïalang la don lang da u Dr. Joram Beda, Commissioner & Secretary ka tnad Health & Family Welfare bad uba dei ruh u Director ka AYUSH, ka Dr. Bisolin Dhar, Homoeopathic Physician, State Nodal Officer ka National AYUSH Mission ha ryngkat bad ki dkhot treikam jong ka AMAM.
Na ka liang ka AMAM ka la rah ïa ki mat ba kongsan bad ki jingïakren kiba kynthup ïa ka rukom shakri jong ki doktor AYUSH ha ka jaka shakri Sorkar kaba la pynpaw ïa ka jingsngewsih hakhmat ka Myntri ha kaba ïadei bad ka jingpynslem ban pyntreikam ïa ka ‘Service Rule’ ïa ki doktor AYUSH ha ki jaka treikam sorkar namar kane ka jingpynslem ka la pynthut ïa ka jingpynrung kam ïa ki doktor AYUSH lyngba ka Meghalaya Medical Service Recruitment Board (MMSRB), kaba long ka jingpynrung kam ba la thaw dang shen na ka bynta ban weng ïa ka jingeh jong ka jingduna ha ka bor briew jong ka tnat ka koit ka khiah.
Hapdeng ka jingïakren kaba dang ïaid ha kaba ïadei bad ka daw jong ka jingpynslem ban pyntreikam, ka Myntri ka la pyntip sha ka seng ba ka jingpynkhreh ïa ka ‘draft’ ka la dep bad ka la la aiti sha ki bor ba dei peit na ka bynta ban bishar bniah bad mynjur katkum ka jingdonkam bad na ka liang ka Myntri ka la pyntip shuh-shuh ba kane ka kam ka dang don ha ka jingpynkhreh ha ka tnad Personnel (Service Rule Cell).
Na ka liang ka Myntri ka la pynthikna ba kan sa ïakren bad u Secretary ka tnad ka koit ka khiah khnang ban pynsted ïa ka jingtreikam bad ka la pynthikna shuh shuh ruh ba kan sa rah ïa kane ka mat hakhmat u Myntri Rangbah ka Jylla, u Conrad K. Sangam namar kumba ka long ka lad ïohkam jong kiba bun ki doktor AYUSH kiba la tbit ban ïoh kam ha ki jaka treikam sorkar, ka don ha ka jingma ha man la ka por kaba ïaid.
Ka seng ka la rah ruh ïa ka mat halor ka jingshah pynduh jong ka ban ïoh jingtip ha kaba ïadei bad ka polisi ba la shna ha ka kyndon shakri ba la aiti sha ka Sorkar. Ka kyndon ban thung kam ka long ka bynta kaba kongsan jong ka kyndon jingshakri kumta ka pynlong ïa uwei-pa-uwei u doktor AYUSH uba tbit kum u nongshim bynta ha kaba ïadei bad ka jingpyntreikam ïa ka bad kumta ka don ka hok ban ïoh ïa ka jingtip ha kaba ïa dei bad ka jingpynwandur ïa ki polisi.
Halor kane ka bynta, na ka liang ka Myntri ka koit ka khiah ka la bthah ïa ki heh kiba don bynta ba ki dei ban pynlong da ka jingïalang bad katei ka kynhun ban ïathuh ïa ka kyndon jingshakri ba la shna na ka bynta ka jingtip kaba kham bha bad pyntip ïa ka katkum kata.
Shuh-shuh ka kynhun ka la ïakren ruh bad ka Myntri ka koit ka khiah ha kaba ïadei bad ka jingbym thungkam ïa ki AYUSH doktor ha ka kam Sorkar ba manla ka por naduh u snem 2015.
Ka kynhun ka la ong ba ki don ki kam bapher bapher kiba lait jong ki doktor AYUSH ha ka tnad ka koit ka khiah kaba la lum ha kine ki snem ba la leit noh namar ka jingbym shim kam. Halor kane ka bynta, na ka liang u Director ka AYUSH, u Dr. Joram Beda u la pynthikna ba ïa ka rukom thungkam ha kitei ka jaka kiba thylli yn sa pyndep mardor hadien ka jingpyntreikam ïa ka ‘Service Rule’ ne ka jingpyntreikam ia ka kyndon jingshakri.
Na ka liang ka seng ka la ong ruh ba dei ban thaw shuh shuh ïa ki kam na ka bynta ka AYUSH doktor ha ka jingshakri ba man ka por ha ka tnad ka koit ka khiah namar ba bun ki jaka sumar ki la treikam bad ki doktor AYUSH hynrei kiba kham bunsien la thung ïa ki katkum ka jingiateh kular ne ka ‘contractual basis’.
Na ka liang ka Myntri ka la pynthikna ba kan sa shimkhia halor kane ka bynta bad kan sa ïakren sani bha bad u Myntri Rangbah ka Jylla halor kane ka kam.
Ka kynhun ka la pan jingtip ruh ha kaba ïadei bad ka jingïaid shaphrang ban thaw ïa ka Directorate jong ka AYUSH bad pynpaw ïa ka jingsngewsih halor ka pyntip ba kam shym la don ka jingïaid shaphrang ha ka ban seng ïa ka Directorate. Ka seng ka la ban jur halor ka jingdonkam jong ka Directorate ban thaw namar ba ka sorkar pdeng ka la thmu ïa kiba bun ki kam pynroi na ka bynta ka tnat AYUSH.
“Ka jingdon jong ka Directorate kan ym pyntikna tang ia ka jingjop ha kito ki projek hynrei kan pynkhlaiñ ruh ïa ka jingshakri ha ka koit ka khiah sha ki paidbah ha ka Jylla lyngba ka AYUSH”, ong ka kynhun.
