Shillong, Nailur 26
U MLA ka Mawryngkneng konstitwensi, Bah Heavingstone Kharpran u la leit ban ïakynduh ïa ka Myntri ka tnad ka koit ka khiah, ka Dr. M. Ampareen Lyngdoh ban kyrpad phah weng ïa ki jingeh kiba kyrkieh ha kaba ïadei bad ka tnad ka koit ka khiah hapoh konstitwensi.
Ha kane ka jingïakynduh, u MLA u la pynsngew ba ka jinglong-jingman ka Sohryngkham Sub-Center, kaba dang shen la kyntiew kyrdan sha ka Public Health Clinic (PHC) hynrei haduh mynta dang don tang u mawnongrim bad ka dang treikam hi kum ka Sub-Center.
U MLA u la pynpaw ruh ïa ka jingsngewkhia jong ki paidbah halor ka jingbym don ki lad ki lynti bad ki briew kiba biang, kaba khanglad ïa ka jinglah jong ka jaka sumar ban pynbiang ïa ki jingshakri ba kongsan ha ka koit ka khiah.
Halor kane, ka Myntri ka la pynthikna ïa u MLA ba ka don ka jingangnud ban weng ïa kine ki jingeh bad kular ban pynlong ïa ka jingpeit bniah ïa ka jaka jong ka Sohryngkham PHC, ryngkat bad 2 tylli kiwei pat ki jaka sumar ha ka konstitwensi ha ka 9 tarik u Risaw, 2024.
Shuh shuh ka Myntri bad u MLA kin ïatreilang ban bishar bniah ïa ki jingtei, ki nongtrei, bad ki jingdonkam jong ki tiar ha kine ki jaka sumar, ryngkat ka thong ban pynbha ïa ka jingai jingsumar ïa ki paidbah ka Mawryngkneng konstitwensi.
Na ka liang u MLA u la pynpaw ka jingkyrmen hadien ka jingïalang da kaba ong ba ka jingleit jurip ïa ka jaka kan long ka sienjam kaba kongsan ban pyntikna ïa ka jingshakri kaba kham bha na ka bynta ka koit ka khiah hapoh ka thaiñ.
