Shillong, Nailur 26
Kawei ka briew kaba ju donkti ban khaïi drok ha Shillong, ka la ngat biang ha ki kyndon jong ka aiñ lyngba ka jingtrei shitom ki pulit ka East Khasi Hills district kiba la ïohkem ïa ka na Jhalupara ha ka 25 tarik Nailur, 2024.
Ïa kane ka briew la tip kyrteng kum ka Aisha Khatoon kaba ju khot ka Pahari, 50 snem ka rta.
Haba ïakren bad u Superintendent of Police ka East Khasi Hills district u Bah S Nongtnger ha ka Sngi Palei, u la ong ba ki pulit ka East Khasi Hills district ki khlem shongthait ha ka jingïakhun ban rat dyngkhong ïa u drok bad ka jingtrei shitom jong ka Anti-Narcotics Task Force (ANTF) ha ryngkat ki pulit ka Thanat bad Jhalupara Outpost ïoh ban kem ïa kane ka briew ha ryngkat u drok heroin 9.72 gram lem bad 73 tylli ki tyndong ba ju thep ïa u drok.
La ïoh ruh ban kurup 4 tylli ki mobile phone nalor ka pisa T. 27,410/-.
U Bah Nongtnger u la ïathuh kane ka dei ka sien basaw ba ki pulit ka East Khasi Hills district ki la kem ïa kane ka briew namar ka la shahkem teng ha u snem 2015, 2017, 2023 bad mynta ka dei ka sien ka basaw ba ka shahkem ha kaba la pynngat ïa ka ha ka jingmudui katkum ki kyndon ka aiñ NDPS.
Haba kylli la kane ka briew kan ngat ruh hapoh ka aiñ PIT-NDPS namar ka la shahkem la saw sien halor kajuh ka kam beaiñ, u SP u la ong ïa kane yn sa phah ka jingtyrwa ban pynrung hapoh ka PIT-NDPS.
U SP u la ong ba kane ka briew khlem pep ka don ki briew kiba ka ïatreilang ban pynïaid ïew ïa u drok bad ka jingtohkit ka dang ïaid namar kane ka briew ka dei kaba la shahkem la bunsien hynrei ka ïoh jamin noh.
U SP u la ong ruh ba ki pulit kim shongthait satia hynrei kin ïai peitngor bad thwet ïa ki briew kiba donkti ban khaïi drok khnang ban rat dyngkhong ïa une u jingdih basniew.
