Shillong, Nailur 26
Ka Deputy Commissioner (DC) jong ka East Khasi Hills District ka Kong Rosetta Mary Kurbah ka la pyntip ba ka ophis haduh mynta kam pat ïohpdiang shithi pan jingbit na kano-kano ka seng kaba mih ha ki khubor ba kin ïaid paidbah ban pyrshah bam doh masi ha Shillong.
Haba u nongthoh khubor u la ïoh ban ïakren markhmat bad ka Kong Rosetta Kurbah ha kamra treikam, ka la ïathuh ba haduh mynta ka sngi ka ophis kam pat ïoh pdiang shithi na kano-kano ka seng ban ïaid paidbah ha Shillong ban pyrshah bam doh masi.
Haba kylli ba aïu na ka liang jong ka DC kan leh lada ka shithi kan wan ha kine ki khyndiat sngi, ka la jubab ba kin ïa peit.
Kane ka jingbuddien u nongthoh khubor ka dei namar ka la mih ka khubor ba ki don ki seng kiba thmu ban ïaid paidbah ha Shillong ha ka 2 tarik Risaw 2024 ban pyrshah bam doh masi.
Kum ban shu pynkynmaw na ka liang ka Hynñiewtrep Youths’ Council ka la leit ban pynpaw jingpyrshah ha kine ki sngi mar shu ïoh jingtip ba kane ka seng ban khang bam doh masi kan wan ai jingpynbna lyngba ki lad pathai khubor ha Shillong Press Club kat haduh ki la hap ban sangeh noh ban wan ai jingpynbna.
Hadien kane la mih shuh shuh sa kiwei ki seng, ki seng saiñ pyrthei bad ki nongot doh masi ban pyrshah ïa kane ka seng ban wan ïalap khang bam doh masi.
