Shillong, Nailur 26
Ka shlem treikam jong u District Transport Officer (DTO) lyngba ki Motor Vehicle Inspector (MVI) ha ka janmiet jong ka 26 tarik u Nailur 2024, ki la pynlong biang da ka jingtalasi bad ka jingpeit bniah ïa ki kot ki sla jong ki ar-shaka kiba kamai be-aiñ kum ki ‘Rapido’ ha ka nongbah Shillong.
Ha kane ka jingpynlong ïa ka jingtalasi ha ki bynta jong ka Laitumkhrah, Police Point la sakhi ba ki MVI ki la ïoh ban bat ïa bun tylli ki ar-shaka ha kaba ki la don ruh kiba pyrshah ïa kane. Pynban na ka liang ki MVI ki la pynsngewthuh ïa kiba ñiah ar-shaka ba ki dei ban pynïasoh ïalade da kaba pynrung kyrteng katkum ki kyndon jong ka Motor Vehicle Act ba kino-kino kiba buh ïa ki kali kamai ki dei ban don ïa ki nombar plate rong stem.
Shuh-shuh na ka liang ki MVI ki la daiñ kuna ruh ïa ki ar-shaka kiba kamai be-aiñ kum ki ‘Rapido’ haduh T.10,000, bad lada kim lah ban siew ïa kane ka kuna kin hap ban wan mih sha ka shlem treikam jong u DTO hapoh ka 15 sngi bad ki bym wan mih katkum ka sngi ba la buh kin hap ban leit mih sha ka ïingkashari.
