Jowai, Nailur 26
Ka shlem treikam u District Sports Officer (DSO), West Jaiñtia Hills District shen kan pynlong ïa ka Open Volleyball Championship bad ka Inter School Open Basketball Tournament 2024 ha Jowai.
Ka Open Volleyball Championship 2024 kan long na bynta ki shynrang bad kynthei ha u Risaw. Kumta la kyntu ïa baroh ki klob, ki skul, ki kolej bad ki synjuk ïalehkai ban ïashim bynta ha kane ka lympung.
Kino-kino kiba kwah ïashim bynta ki lah ban shim ïa ka entry form na katei ka shlem treikam bad ka tarik khatduh ban pdiang ïa ka entry kan long ha ka 9 tarik u Risaw.
Ha kaba ïadei bad ka lympung ïalehkai Inter School Open Basketball la pynjlan ïa ka tarik pdiang ïa ki entry haduh 8 tarik u Risaw. Namarkata, la wer ïa baroh ki skul kiba don hapoh ka kyrdan Higher Secondary ha West Jaiñtia Hills ban wan shim bynta ha kane ka lympung. Ïa kane ka lympung yn pynlong na ka bynta ki kynthei bad shynrang ha ka taïew balai jong u Risaw ha Kiang Nangbah Stadium.
