Shillong, Nailur 26
U Bah Banshai Marbaniang uba dei u President ka Meghalaya Awaken Concern Citizens (MACC) Sengkmie bad uba bat ruh kum u Chairman jong ka Awaken India Movement (AIM) ka Jylla Meghalaya, u la ong ba ka jingkren bad jingthet-kti jong u Myntri Rangbah ka Jylla, u Conrad K Sangma ban khynñiat ïa ka jingaibor halor ka jingthmu ban wan ïaid kjat ki ‘riewngeit Hindu shapoh ka Jylla sha ki bor pynïaid ka District, ka long kaei-kaei kaba pynsah ïa ki paidbah ha ka um-dum.
Kum ban shu kdew hangne, na ka liang u Myntri Rangbah ka Jylla, u Conrad K Sangma, lyngba ki lad pathai khubor u la kyntait bad ong ba ïa ka rai ban ai lane ban ym ai ïa ka NOC sha ka kynhun ki ‘riewngeit Hindu ban pynlong ïa ka jingïaid paidbah ne ka ‘Yatra’ ha ka 2 tarik u Risaw 2024 ha ka Jylla ban pynbna ba ka masi kam dei ka mrad hynrei ka dei ka kmie bad ban khang ruh ïa ka shoh doh bad ka jingbam doh masi kam shong satia ha u hynrei ka shong ha ka bor jong ka Deputy Commissioner ban leh ïa kata.
Halor kane ka jingkren jong u Myntri Rangbah ka Jylla, u Bah Banshai Marbaniang u la ong ba ha ka jingsngewthuh kaba shai, u Myntri Rangbah jong kano-kano ka Jylla u dei u ba ha khlieh duh ban synshar ïa ka Jylla bad ka jingaibor ha kano-kano ka bynta ruh ka shong ha u.
“Ha man la ki bynta bapher-bapher la ka long ha kaba ïadei bad ki skhim kiba ka Sorkar ka wanrah na ka bynta ka roi ka par, ki projek ne kino-kino ki bynta ruh wat haduh ban pynkup burom ruh, la leh hi na ka liang jong u Myntri Rangbah hynrei mynta pat ngi ïoh ba kynsan-kynsan halor kane ka bynta, na ka liang u Myntri Rangbah u la kyntait ban aibor da kaba u la khynñiat pat sha ka Deputy Commissioner ba kan ai ïa ka bor”, ong u Bah Banshai.
U la ong ba kum ka kynhun bad ki paidbah ka Jylla ki buh ïa ka jingkylli sha u Myntri Rangbah ka Jylla ba kaei ka daw kaba la pynlong ïa u ba un hap ban kyntait halor kane bad kane ka jingkyntait jong u, ka pynpaw shai ruh ba ka don kaei-kaei shalyndet.
U Bah Banshai u la ong ba kum u Myntri Rangbah u dei ban pynshai sha ki paidbah halor ka jingkhynñiat jong u ïa ka bor sha ka DC bad u la ong ba lada ka DC ka lah ban shimti ïa kane ka bynta, kane ka mut ban pyntreikam ïa kino-kino ki skhim nangne shakhmat ruh yn nym dei shuh ban kren da u Myntri Rangbah hynrei la dei ban aiti da ka DC ba kan shim ïa kano-kano ka rai ban jied ïa ki paidbah nongshong shnong la ki dei ban ïoh ne ban nym ïoh ïa ka skhim.
“Lada u Myntri Rangbah u dang kyntait ban ai ïa kano-kano ka rai lada ka dei ha ka jingwan ki mynder ri hapoh ka Jylla jong ngi, kata ka mut ba u Myntri Rangbah u dei u bym donbor eiei hynrei ka donbor da ka DC bad lada ka DC ka donbor, ka mut ha manla la ki distrik la dei ban thung noh tang kawei ka DC hapoh ka Jylla jong ngi”, bynrap u Bah Banshai.
Shuh-shuh u Bah Banshai u la ong ba lada na ka liang jong u Myntri Rangbah u kyntait bad aiti ïa ka bor sha ka DC ba kan shim ïa ka rai, na ka liang ka kynhun ka la rai kan shim ïa ka rai ban pynlong syndon da ka ‘beef festival’ ne ka tamasa bam doh-masi hapoh ka sor Shillong.
“U Myntri Rangbah u la kyntait lypa ïa ka Jylla Meghalaya ban long Myntri Rangbah, na kata ka daw kum ki paidbah bad ki nongshong shnong ngi dei ban wad noh da uwei u Myntri Rangbah ban long u khlieh duh ban synshar ïa ka Jylla Meghalaya”, bynrap u Bah Banshai.
