Shillong, Nailur 27
Ka Sorkar Jylla ka la rai ban phah jingthoh sha ka Airport Authority of India (AAI) ban ym shah hiar ïa ka liengsuiñ ha Kad Liengsuiñ ha Umroi kaba kit ïa u nongïalam uba dei na ka kynhun kaba thmu ban wan sha Shillong ban pynlong ïa ka jingïaid paidbah ban pyrshah ïa ka jingshoh doh ïa ka masi hynrei ban kheiñ ïa ka masi kum ka kmie ha India.
Haba kren sha ki lad pathai khubor hadien ka High Level Meeting ha Secretariat ha ka Sngi Thohdieng, na ka liang u Chief Secretary u Bah D.P Wahlang u la ong ba ka Sorkar Jylla hadien ba la ïoh jingtip ba kita ki briew kiba thmu ban wan sha Shillong kin sa wan da ka liengsuiñ ha Umroi, la lum ïa ka jingïalang ban ïakren lang bad ki heh pulit lem bad ki bor district.
Kumta u la ong ba ka Sorkar Jylla bad ki bor district ki la shim lypa ki sienjam ban khanglad ïa kano-kano ka jingleh kaba lah ban pynthut ïa ka shongsuk shongshngaiñ ha kane ka Jylla.
“Hadien ba la ïatai sani ïa ka jinglong-jingman la shim ïa ka rai ban thoh sha ka AAI da kaba bthah ban ym shah ban hiar ka liengsuiñ ha Kad Liengsuiñ ha Umroi ha ka Sngi Saitjaiñ,” la ong u Chief Secretary.
Na ka liang u nongïalam ka Central Puja Committee (CPC), u JL Das u la ong ba ka CPC kam don jingtip ban don kum kata ka jingïaid paidbah ha Shillong bad kam kwah ban don kano-kano ka jingpynthut ïa ka jinglehkmen Puja ka ban sa sdang ruh naduh ka 2 tarik Risaw.
U Das u la ong ba ka jingrakhe ïa ka Durga Puja ka ju long hapdeng ka suk ka kmen bad na ka liang ka CPC kam pdiang satia ïa kum kata ka jingpynlong ïa ka Yatra bad ym dei satia ban pynthut ïa ka suk ka saiñ bad ka jinglehkmen Puja. Ha kawei pat ka liang, ka Deputy Commissioner ka East Khasi Hills district ka Kong R M Kurbah ka la pynmih ïa ka hukum ban pynjari da ka kyndon 163 jong ka Bharatiya Nagarik Suraksha Sanhita (BNSS) ha nongbah Shillong kaba mana ban ïalum briew palat 5 ngut.
Kane ka jingpynjari ka dei hadien ba la don katto-katne ki kynhun kiba thmu ban pynlong ïa ka Gau Dhwaj Sthapana Bharat Yatra ha Shillong.
Kane ka jingïaid paidbah ka dei kaba la thmu ban pynlong ha Shillong ha ka 2 tarik Risaw, 2024 na ka bynta ban ïalap pyrshah ïa ka doh masi hynrei dei ban kheiñ kyntang bad ñiew kum ka kmie ïa ka masi ha India.
Haba pynmih ïa kane ka hukum ha ka Sngi Thohdieng ka DC ka la ong ba kiba thmu ban pynlong kum ïa kata ka Yatra ki khlem pan kano-kano ka jingbit bad kum kata ka jingïaid paidbah ka lah ban wanrah ka jingthut ha ka jinglong-jingman ka suk ka saiñ ha Shillong bad ha ka East Khasi Hills district baroh kawei.
Namarkata, kum ka majistor jong ka district, ka Kong Kurbah ka la ong ba ka pynjari ïa ka kyndon 163 BNSS da ka jingthmu ban khang ïa kano-kano ka kynhun ban ïaid paidbah kaba lah ban pynthut ïa ka jingïaid beit ka suk ka saiñ ha kaba la mana ban ïalum briew palat 5 ngut na ka bynta ban ïaid paidbah ha ki bynta ka nongbah Shillong kynthup ruh ha Shillong Urban Agglomeration.
Lada don ka jingpynkheiñ ïa kane ka hukum kaba la pynjari, yn ngat ha ki kyndon ba shah pynsaja katkum ka kyndon 223 BNS, nalor kiwei pat ki kyndon kiba ïahap.
Kane ka hukum kan treikam naduh ba la pynjari tad haduh ban pynmih biang da kumwei pat.
