Jowai, Nailur 27
U Deputy Commissioner ka West Jaiñtia Hills u la bthah ïa ka Fishing & Environment Protection Association (F&EPA) ban ym pynlong ïa ka jingïakob khwai dohkha kaba thmu ban pynlong ha ka 28 tarik Nailur.
Kane ka la wan hadien ba u DC u la ïoh pdiang ïa ka shithi ujor na u Waheh Shnong, Panaliar, Jowai ha kaba ïadei bad kane ka jingïakob khwai dohkha.
Ha ka shithi, ka shnong Panaliar, Jowai ka la rai ban ym ai lad ïa ka Jaiñtia Fishing & Environment Protection Association ban pynlong ïa kane ka jingïakob khwai dohkha hapoh u pud u sam jong ka Dorbar Shnong, Panaliar Jowai.
Kumta ha kaba ïadei bad kane, u DC u la bthah ïa ka F&EPA ban ym pynlong ïa kano-kano ka jingïakob khwai dohkha hapoh u pud u sam jong ka Dorbar Shnong Panaliar, Jowai khnang ban pynneh-pynsah ïa ka shongsuk-shongsaiñ ha ka thaiñ. Ha kaba ïadei bad kane, na ka liang ka shnong Panaliar ka la pyntip ba kan buh ïa ki Volunteer shnong ryngkat bad ki pulit.
