Shillong, Nailur 27
Hadien ka jingïoh khubor ba ka kynhun ki ‘riewngeit Hindu kin sa wan ban hiar ha Kad Liengsuiñ Umroi ha ka 27 tarik u Nailur 2024 ha ka por mynsngi ban wan pynlong ïa ka jingïaid paidbah hapoh ka Jylla Meghalaya ban pynlong ïa ka jingïaid paidbah ne ka ‘Yatra’ hapoh ka Jylla ban pynbna ba ka masi kam dei ka mrad hynrei ka dei ka kmie bad ban khang ruh ïa ka jingshoh doh bad ka bam doh-masi, na ka liang ka Hynñiewtrep Integrated Territorial Organisation (HITO) mar ïa ïoh jingtip halor kane ka khubor, ka la leit ban hiar sha katei ka jaka ban pynsangeh bad khanglad ïa kitei ki ‘riewngeit Hindu ba kin pynlong ïa katei ka jingïaid kjat.
Haba ïoh ban ïakren bad u President ka HITO Sengkmie, u Bah Donbok Dkhar u la ong ba ka seng ka la long kaba la pynkhreh lada kitei ki ‘riewshit niam Hindu ki wan ha kano-kano ka por ruh bad ong ba ka seng kan nym ailad satia ïa kitei ki briew ba kin wan mushlia bad batai stad ïa ka kam kiwei.
Ha katei ka sngi, na ka liang ka HITO ha ryngkat ka jingrah ïa ki placard kiba la thoh “Wat pynïanujor ïa ki kmie jong ngi bad ki masi”, “Wat ju tuklar ïa ka jingbam dohmasi jong ngi”, “Kane ka kynti phi la ïaid shaba palat. Wat pynbitar ïa ngi. Da ka thma yn pynlong”.
