Shillong, Nailur 27
Khnang ban kham pynbha ïa ki lad jingsumar ïa ka jingpang bampong lane cancer khamtam ban lap kham kloi ïa kane ka jait jingpang ha ka met, ka Federation of Indian Chamber of Commerce and Industry ka la pynlong ïa ka jingïatai na ka bynta ban pruid dak ïa ki lad ki lynti ki ban plie lad ban ïoh ïa ki jingsumar bad ban ïoh ïa ka jingsumar kaba kotbor ban phah sumar.
Ïa kane ka jingïakynduh kaba la tip kum ka FICCI Roundtable For North Eastern Region la wan ban ïashimbynta da ki doktor bad ki kynhun kiba ju trei ban ïakhun ïa ka jingpang bampong kaba la pynlong ha State Convention Centre ha ka Sngi Thohdieng.
Ha kane ka sngi la donlang ki doktor kiba dei khlieh nongpynïaid jong ki jaka sumar bad ki doktor kiba peit tnat sumar bampong kynthup ki doktor na North Eastern Indira Gandhi Regional Institute of Health and Medical Sciences (NEIGRIHMS), ki doktor kiba sumar ïa ka jingpang bampong ha Meghalaya nalor ki doktor na kiwei pat ki Jylla bad ki ophisar ka Sorkar Meghalaya kiba peit ïa ka tnat ka koit ka khiah.
Ka Myntri ka tnat ka koit ka khiah ruh ka la wan ban ïadonlang ha kane ka sngi na ka bynta katto katne por.
Haba ïakren bad ka Dr Anisha Mawlong kaba dei ka khliehduh jong ka tnat sumar bampong ha Shillong Civil Hospital, ka la batai shaphang ki jingïakren kynthup ki lad ki lynti kiba donkam ban pynbha ïa ka jingsumar, bad ka jingpynïar shuh shuh ïa ki jaka sumar khnang ban plielad ïa ki nongshong shnong ba kin ïohlad ban phah peitbniah ïalade bad ban lap kham kloi ha ka por kaba ka jingpang bampong kam pat ktah jur.
Ka Dr. Mawlong ka la ong ba na ka bynta ka jylla Meghalaya la ïakren kumno ban buh ruh kawei ka Cancer Care Centre ha Garo Hills namar ka long kaba shitom ïa ki nongpang ban wan na Garo Hills shaduh Shillong.
Haba kylli shaphang ka jingdon ka jaka sumar bampong ha NEIGRIHMS bad ki lad jingsumar, ka Dr Mawlong ka la ong ba ka NEIGRIHMS ka dei kaba heh kaba la kham biang ki tiar ki tar ban peitbniah ïa kiba ïoh pang bampong, hynrei ka NEIGRIHMS ruh ka mad jingeh namar kam ïoh ïa ki doktor ki ban don ha baroh ki tnat jingsumar bampong naduh ki Medical Oncologist namar ka don tang Radiation Oncology bad Surgical Oncology haduh mynta. Ka la ong ba ka NEIGRIHMS ka la don ruh ka PET Scan hynrei kam ïoh briew ban peit ïa kane ka mashin.
