New Delhi, Nailur 27
Ka tnad kam Jngoh Kai pyrthei ka Sorkar India ha ka Sngi Thohdieng ka la pynbna ïa ki nongjop jong ka jingïakhun ‘Best Tourism Villages Competition 2024’, ha ka sngi rakhe ïa ka ‘World Tourism Day’.
Ka shnong Umden bad Mawphlang ha Meghalaya ki la jop hapoh ki phang shna jingshna bad jinghiar pateng. Ban kyntiew ïa ki kam jngoh kai pyrthei ha ki shnong jong ka India, la sdang ïa ka jingïakhun ‘Best Tourism Villages Competition’ ha u snem 2023.
Ka jingpynleit jingmut ka long ban lap bad ai jingithuh ïa ki shnong kiba pynneh bad kyntiew ïa ki jingdon-jingem ha ka deiriti bad ka mariang lyngba ki jingngeit tynrai ha ka imlang-sahlang bad ka jingïeng skhem na bynta ka jingïaineh ha baroh ki bynta.
Ka kylla kaba nyngkong jong ka jingïakhun ‘Best Tourism Villages Competition’ ha u snem 2023 ka la ïoh ki aplikeshon na 795 tylli ki shnong. Ha ka kylla kaba ar jong ka jingïakhun, la ïohpdiang 991 tylli ki aplikeshon na 30 tylli ki Jylla bad UT bad na kine, 36 tylli ki shnong ki la ïoh jingithuh kum ki nongjop ha 8 tylli ki thup jong ka jingïakhun ‘Best Tourism Villages Competition’, 2024.
