Shillong, Nailur 27
U MLA ka BJP bad Myntri ka Sorkar Jylla, Bah A.L. Hek u la kyrpad ïa ka kynhun niam kaba thmu ban pynlong ‘Rally’ hapoh nongbah ha ka 2 tarik Risaw ban ym ïaid shakhmat bad katei ka kam namar ka long kumba pynshit ïa ki nongshong shnong ka Jylla.
Katei ka ‘Rally’ ka long shi bynta jong ka ‘Gau Dhwaj Sthapana Bharat Yatra’ – ka jingïalap ha kylleng ka ri ban ïada ïa ki masi, ban khang ïa ka jingshohdoh ïa ki (masi) bad ban kyntiew ïa ka masi sha ka kyrdan jong ka ‘Rashtra Mata’.
“Nga la dep ong ba kane ka dei ka Jylla bam doh masi…nga la kren da kaba shai wat ha kato ka sngi ruh,” ong u Bah Hek haba kren sha ki lad pathai khubor ha ka Sngi Thohdieng.
Haba kyrpad ïa ka kynhun ban ym ïaid shakhmat bad katei ka ‘Rally’, u la ong, “Ha ka Jylla bam doh masi, lada phi khot ïa kaba kum kata ka ‘Rally’, phi pynshit ïa ki nongshong shnong ka Jylla.”
Haba kylli, u la ong ba ka Sorkar lyngba u Myntri Rangbah ka Jylla kan sa shim ïa ka rai, hynrei ïa mynta um pat lah ban ong eiei.
Kum ban shu kdew hangne, ki dkhot na ki kynhun seng bapher-bapher ba kynthup ïa ka Khasi Students’ Union (KSU), Hynñiewtrep Youths’ Council (HYC) bad Hynñiewtrep Integrated Territorial Organisation (HITO) ha kane ka sngi ki ïalum habar ka kad liengsuiñ Umroi kum ka dak ka jingpyrshah ïa katei ka kynhun bad ka sienjam jong ka.
Ki la kren shai ruh ba kin ym shah pynlong ïa katei ka ‘Yatra’ hapoh ka Jylla.
Na ka liang ki bor distrik ka Ri-Bhoi kynthup ka tnad pulit ki wan poi mar-mar ha katei ka jaka khnang ban ym mih kano-kano ka jiingjia bym sngewtynnad.
Ha kawei ka liang, u Jagadguru Shankaracharya Swami Shri Avimukteshwaranand Saraswati lem bad ki dkhot jong u kiba dei ban wan poi ha katei ka kad liengsuiñ ha ka Sngi Thohdieng, ki la pyntip ba kin sa wan noh (ha katei ka kad liengsuiñ) ha ka Sngi Saitjaiñ da ka liengsuiñ ba kyrpang (Charter Flight).
