Nongpoh, Nailur 27
Da ki spah ngut ki nongïalam bad dkhot jong ki seng ba kynthup naduh ka Hynñiewtrep Youths’ Council (HYC), ka Khasi Students’ Union (KSU), ka Hyn-ñiewtrep Integrated Territorial Organisation ryngkat ki nongïalam ka Synjuk Ki Rangbah Shnong ka Ri-Bhoi District ha ka Sngi Thoh dieng ki la wan poi ha Kad Liengsuiñ Umroi ban pyrshah jur halor ka jingthmu ban wan ïuh-kjat u Jyotirmath Shan-kar a charya Avimuk-teshwaranand, nongïa-lam ka ‘Gau Gath-bandhan’ ban pynlong ïa ka ‘Gau Dhvaj Sthapna Bharat Yatra’ ha ka nong bah Shillong.
Ka jinghiar jong kitei ki nongïalam bad dkhot jong ki kynhun seng sha katei ka Kad Liengsuiñ ka dei hadien ka jingmih khubor ba kitei ki shitniam ki thmu ban wan sha ka Jylla lyngba ka Kad Liengsuiñ Umroi mynta ka sngi na ka bynta ban ïalap paidbah ban pyrshah ïa ka jingbam doh masi bad ban ñiew ïa ka kum kata ka kmie.
Haba kren sha ki lad pathai khubor, u Bah Roykupar Synrem, President ka HYC u la ong ba seng hi kan ym ai lad ïa ki briew ba nabar ba kin wan ban batai stad ïa ka rukom im jong ka jaidbynriew Hynñiewtrep da kaba ong ruh ba kum ka jaidbynriew hi ka kheiñ bad ñiew burom bha ïa ki kmie bad kam pynïahap satia ïa ki kmie kum ka masi ne ki mrad.
U la ong ruh ka seng kan ym ailad satia da lei-lei ïa kane ka seng niam ba kan batai stad ïa ka “jingngeit niam ka jong ngi, kaei ba ngin bam bad kaei ba ngim dei ban bam naba ngi don la ka jong ka hok katkum ka Riti Synshar bad ngin ïai leh kumta katba ngi dang im ha kane ka ri ka jong ngi.”
Utei u nongïalam ka HYC u la ong ruh ba kat haduh mynta, ym pat shym la ïohi satia la ki bor distrik ka Ri-Bhoi bad East Khasi Hills ki la ai jingbit ne em ïa kitei ki seng niam ban pynlong ïa katei ka ‘Yatra’ da kaba ong ba ki bor pynïaid distrik ki dei ban khang pyrshah ïa ka jingthmu pynlong ‘Yatra’ bad lada jia ba kitei ki sengniam ki ïoh lad ban pynlong, ka jingkitkhlieh kan dei ha ka ki bor pynïaid distrik, u Myntri Rangbah lem bad ka kynhun Myntri Sorkar jong u lada mih kano-kano ka jingkulmar.
Na ka liang u Bah James Hilter Mawphniang, General Secretary ka KSU NKHD, u la ong ba ka seng hi ka mih ban ïeng na ka bynta ki paidbah ka Ri-lum Khasi-Jaiñtia ban ym ailad ïa ki bor ba nabar ba kin wan ban mushlia ïa ka rukom im jong ka jaidbynriew bad ba ka seng ïeng skhem halor ka nongrim ban pynneh-pynsah ïa ka rukom hikai naduh ki por mynbarim ban im laitluid.
U la byrthen ruh ba ka seng kan ym ailad satia ïa kitei ki bor ba nabar ba kin wan ban ïalam bakla ïa ki paidbah ka Bri u Hynñiewtrep bad kan ïai pyrshah horkit-hordang ïa katei ka jingthmu la ka long ha kano-kano ka rukom.
U Bah Balajied Jyrwa, General Secretary ka HITO, Shillong City bad u Bah P.B. Sylliang, General Secretary ka Synjuk ki Rangbah Shnong ka Ri-Bhoi ruh ki la pynpaw ïa ka jingpyrshah jur halor ka jingthmu jong ka seng shitniam ban wanrah ïa ka jingthut ha ka shongsuk shongsaiñ ha ka Jylla da kaba thmu ban pynlong ïa ka masi kum kata ka kmie kaba long pyrshah ïa ka rukom im bad ka jingngeit jong ka jaidbynriew.
U Bah Balajied Jyrwa u la pyntip ruh ba hadien ka jingïoh ïakren bad ki majistor, la ïoh jingtip ba utei u nongïalam ka seng niam um shym la lah shuh ban poi mynta ka sngi bad la pynkynriah noh lashai ka sngi. U Bah Jyrwa u la ïathuh ruh ba na ka liang jong u majistor u la ai jingkular ïa ki ba ki bor pynïaid distrik ba kin ym ailad satia ïa utei u nongïalam ka sengniam ba un wan ban ïuh kjat ha katei ka Kad Liengsuiñ ha Umroi.
Wat la na ka liang u majistor u la ai ïa katei ka jingkular, hynrei na ka liang ki kynhun seng ha shwa ba kin ïa pra noh na katei ka Kad Liengsuiñ Umroi, ki la pyntip ba kin ïai ap ha katei ka Kad Liengsuiñ lashai ka sngi ruh ban ym ailad ïa katei ka jingwan ïuh-kjat u Jyotirmath Shankaracharya Avimukteshwaranand, nongïalam jong ka Gau Gathbandhan.
