Shillong, Nailur 27
Uwei u briew u la shah thok pisa palat T.19 lak ha uwei pat uba kam ïalade ba u dei u Assistant Area Manager ha KFC.
“Ha ka 12 tarik Nailar, 2024, la ujor ejahar ha thanat Rynjah halor ka skhim bei tyngka thok. U nongujor u la pyntip ba uwei u ‘riew shimet uba kyrteng u Abhishek Kumar Yadav, uba la kam thok ïalade ba u dei u Assistant Area Manager ha KFC, u la ai ïa ka ‘Investment Plan’/’Business Plan’ kaba la kam ba ka shongdor haduh T.19,27,000/-,” ong u Superintendent of Police ka East Khasi Hills, Bah S. Nongtnger, IPS ha ka kyrwoh khubor.
Ha kajuh ka por, u la ong ba da kaba ngeit ba katei ka jingtyrwa ka long kaba dei hok, u nongujor u la siew ïa ka sien siew kaba nyngkong ha ka 14 tarik u Jylliew, 2024 bad ïa ki jingsiew kiba hadien ha ki taïew kiba bud – ha kaba ïa ka sien siew kaba khatduh la siew ha ka 6 tarik u Nailar, 2024.
U SP u la ong ruh ba dei tad hadien ka jingpynslem kaba la neh la katto-katne por ba u nongujor u la lap ba u Abhishek Kumar Yadav um don jingïadei eiei bad ka KFC, pynban u la thok ïa u.
“Ha kaba ïadei bad kane, la pynngat mukotduma kam be-aiñ hapoh thanat Rynjah (vide Case No. 138(08)2024), bad ha ka jingtohkit kaba dang ïaid, la ïoh ban kem noh ïa u Ibrahim Ansari (59 snem ka rta) na ka shnong Senha, Muslim Mohalla, Lohardaga District, Jharkhand da ka kynhun pulit ka East Khasi Hills D.E.F,” ong utei u heh pulit.
Shuh shuh u Bah Nongtnger u la bynrap ba ka jingtohkit ka dang ïaid shakhmat ha ryngkat ka jingpyrshang ban pynleit jingmut ban pynithuh bad kem ïa kiwei pat ki suba donkti ha kane ka kam.
