Shillong, Nailur 27
Ka kynhun ïa kaba la tip kum ka Khasi Jaiñtia Butchers’ Association ha ka jingïatreilang bad ka Federation of Khasi Jaiñtia & Garo People (FKJGP) Sengkmie, ki la phah da ka shithi sha ka Deputy Commissioner jong ka East Khasi Hills District, ka Kong R.M. Kurbah, kiba la pynsngew halor ka jingpyrshah ïa ka jingthmu ïaid paidbah jong ka seng ki ‘riewngeit Hindu ïa kaba la tip kum ka Gau Dhwaj Sthapana Bharat Yatra rally ban pynbna ba ka masi kam dei ka mrad hynrei ka dei ka kmie bad ban khang ruh ïa ka jingshoh doh bad ka bam doh-masi.
La ong ba ïa kane ka ‘rally’ ne ka jingïaid paidbah la pynbeit ban pynlong ha ka 2 tarik u Risaw 2024. Ka jingwan poi jong kitei ‘riewngeit Hindu hapoh ka Jylla la ong ba kin wan ha ka Sngi Saitjaiñ ka 27 tarik u Nailur 2024 ha ka jingïalam jong u Jagadguru Shankaracharya Swami Avimukteshwaranand Saraswati ba la khmih lynti ban wan poi ha ka kad liengsuiñ ha Umroi ha ka por 12 baje mynsngi.
Ha ka jingïakynduh bad ka Deputy Commissioner ka EKH, na ka liang u President Rangbah ka FKJGP bad uba long ruh u nongaibuit jong ka seng KJBA, u Bah Dundee Cliff Khongsit haba ïakren bad ki lad pathai khubor ha ka 27 tarik u Nailur 2024, u la pyntip ba ka seng ka pynpaw ka jingpyrshah halor ka jingthmu ban pynlong ïa ka jingïaid kjat halor ka phang “Mother of the Nation” lane ban pynbna ba ka masi ka dei ka kmie jong ka Ri.
“Ngim kum ka Jaitbynriew, ngi dei ka Jaitbynriew kaba bam dohmasi bha bad kane ka long kaei-kaei kaba ym sngewtynnad ban ailad ïa kita ki shit niam Hindu ba kin wan sha kane ka Ri bad ka Jylla jong ngi ban wanrah ïa ka jingpynshit niam ha kaba ka lah ruh ban wanrah ïa ka jingsngewpher Jaitbynriew hapoh kane ka Jylla jong ngi”, ong u Bah Khongsit.
U la ong ba kumna 80% ki briew hapoh ka Jylla ki dei kiba bam doh-masi bad ka dei ruh ka lad ai kam-ai jam ïa ki briew hapoh ka Jylla ba kin die ïa ka doh-masi ha ki dukan jong ki bad ong ba lada ailad ïa kum kine ki ‘riewshit niam ban wan pynshit hapoh ka Jylla ban pynsangeh ïa ka jingbam doh-masi, kan dei ka jingduh kaba khraw ïa ka Jaitbynriew baroh kawei.
U Bah Khongsit u la ong ruh ba kum ka seng ka jingthmu ba kongsan jong ka, ka long halor ka jingktah ïa ki paidbah babun balang tang na ka daw kane ka jingmut bad kane ka jingthmu jong ki ‘riewngeit Hindu kan ktah khamtam eh ïa ki trai shnong ha kaba la pynsngew ha ka DC ba kan sngewkhia halor ka jingpyrshah jong ka seng bad ban nym ai bor ïa kane ka seng ki ‘riewngeit Hindu ban pynlong ïa ka jingïaid kjat. Na ka liang ka DC ka la pyntip ha ka seng ba kitei ki ‘riewngeit Hindu kim pat shym la wan pan jingbit satia na ka ophis treikam jong ka ban pynlong ïa ka jingïaid kjat hynrei na ka liang ka seng ka la ong ba kan nym ap satia haduh ba katei ka kynhun kan pan jingbit. Hynrei shwa kata, na ka liang ka seng FKJGP bad ka KJBA ki la wan ban buh ïa ka jingpyrshah hakhmat ka DC lada ka don kano-kano ka jingpan jingbit na katei ka kynhun shitñiam Hindu ha ki sngi ban sa wan.
La ong ruh ba ka seng KJBA bad ka seng FKJGP ki la ïasnohkti lang kawei halor ka jingdonkam ban peit bniah bad sngewkhia ïa ka riti ka dustur bad kiba thmu ban wanrah ïa ki jingïalam bakla lyngba ki ñiam ki rukom ha ka thaiñ hi baroh kawei.
