Shillong, Nailur 29
Ka kynhun ki seng ba ïadon bynta ha ki kam jngoh kai pyrthei hapoh ka Jylla ha ka jingïalang kaba la long ha ka Sngi Saitjaiñ ka la ban jur halor ka jingdonkam ban pynneh-pynsah ïa ka jinglong-jingman kaba suk-saiñ hapoh ka Jylla na bynta ka jingmyntoi lang jong baroh khamtam ki nongshang kai pyrthei.
“Ka jingïakren ka la long halor ki jingeh ba ïakynduh da ki nongñiah taksi ‘Tourist’, khamtam ïa ki jingsngewkhia ba la pynpaw da ka All Khasi Meghalaya Tourist Taxi Association (AKMTTA). Hadien ka jingïatai sani bha, ki dkhot jong baroh ki seng ki la mynjur halor ka jingdonkam ban pynneh-pynsah ïa ka jinglong-jingman kaba suk-saiñ ha Meghalaya na bynta ka jingmyntoi jong baroh kiba don bynta ha ka kam jngohkai pyrthei bad ki nongshang kai pyrthei,” ong u General Secretary ka Tour Operators Association of Meghalaya (TOAM), samla Gerald Samuel Duïa ha ka kyrwoh khubor.
U la ïathuh ruh ba ka jingïalang ka la pynskhem biang ïa ka kular ban pyntikna ïa ka jingïada bad jingshngaiñ jong ki nongshang kai pyrthei kiba wan sha ka Jylla.
Kum ban shu kew hangne, ha katei ka jingïalang kaba la khot da ka TOAM ha State Convention Centre, Shillong ha ka Sngi Saitjaiñ, la wan ban ïashim bynta da 11 tylli ki seng ba don bynta bad ki kam jngohkai pyrthei ka Jylla ba kynthup ïa ka TOAM, Meghalaya Tourism Development Forum (MTDF), AKMTTA, Tour Guides Association of Meghalaya (TGAM), All Shillong Tourist Taxi Drivers Union Organization (ASTTDUO), Meghalaya Tourist Taxi Association (MTTA), Federation of Shillong Hotels (FOSH), Sohra Region Tourism Association (SRTA), Jaiñtia Tourism & Environment Society (JTES), Khasi Hills Tourist Taxi Association (KHTTA), bad Ri-Bhoi Tourism & Environment Development Forum (RBTEDF).
