Shillong, Nailur 29
Ka Hynñiewtrep Youths’ Council (HYC) ha ka Sngi Saitjaiñ ka 28 tarik Nailur 2024 ka la pynlong da ka jingïalang ban ïathir halor ka jingjyllei u drok hapoh ka Jylla khamtam hapoh ka Nongbah Shillong kaba la wanrah shibun ki jingsniew hapoh ka imlang-sahlang bad ka jingjot jong ki khun samla ka Jylla.
Kum ban shu kdew hangne, na ka liang ka HYC ka la sdang ïa ka thma pyrshah ïa u drok naduh u bnai Jymmang 2024.
Ha kane ka sngi la don lang da u Working President ka United Democratic Party (UDP) u Bah Jemino Mawthoh, u nongaiktien ka Bharatiya Janata Party (BJP) u Bah Mahariom Kharkrang, u Working President ka Khun Hynñiewtrep National Awakening Movement (KHNAM) u Bah Thomas Passah, ki Rangbah Shnong na ki shnong ka Nongbah Shillong, ki longkmie, ki longkpa bad ki samla.
Haba ïathir ïa kane ka mat, na ka liang ki nongïalam jong ki shnong bapher-bapher haba kren ki la buh ïa ki jingkylli bad ai jingmut sha ka seng kumno ban tehlakam ïa ka jingjyllei u drok ha ki shnong ki thaw bad ruh ki la ong ba ka donkam ban ïatreilang hapdeng ki nongïalam shnong ban tehlakam ïa ka ïadie-ïathied bad ka jingdih drok.
Na ka liang u President ka HYC, u Bah Roykupar Synrem, u la ong ba ka seng ka la phah haduh 120 ngut ki samla ba la kyrni ha u drok sha ka jaka sumar lane ki ‘Rehabilitation Center’ kiba don ha Assam hadien ka jingmynjur ki kmie ki kpa bad ka shem jynjar pat ïa ki bym don ki bahaïing-bahasem ban phah sha ki jaka sumar namar la hap ban thoh bad saiñ lyngba ki kot ki sla da ki bahaïing.
U Bah Roykupar u la ong ba ka Sorkar ka dei ban pyntreikam da ka rukom treikam ban buddien ïa ki briew kiba wan nabar ka Jylla khamtam napoh ka Jylla Manipur.
La ïoh ban ai jingmut da u Bah Thomas Passah bad ong ba ka Sorkar ka dei ban thaw kawei ka ‘Rehabilitation Center’, bad ha kane ka jaka ai jingsumar, ka dei ban don lut ki jaka sumar, ki jaka ai jinghikai pyntbit (Skill Training) ha ki kam bapher-bapher, ki jingïalehkai kilan met bad kiwei-kiwei ki ban ai jingmyntoi ïa ki samla kiba don ha kine ki jaka ai jingsumar.
Na ka liang u Rangbah Shnong ka shnong Riatsamthiah, u Bah Mariahom Kharkrang haba ïathir jingmut u la ong ba ka thma pyrshah ïa u drok ka dei hi ban sdang na la ïing bad dei ban ai ïa ki jingpynsngewthuh paidbah nyngkong eh sha ki kmie ki kpa halor u drok.
Katba na ka liang u Bah Jemino Mawthoh u la ong ba lada ki don 3 lak ngut ki nongdih drok hapoh ka Jylla, ka mut kane kam dei ka thma kaba heh ba ngi dei ban ïakhun hapoh ka Jylla bad dei ban don da ka jingïaleh kaba khlaiñ bad ka Sorkar ka dei ban shimkhia bha halor kane bad ka Sorkar ka dei ban pynkhlaiñ bha ïa ka ANTF ban pyrkhing bad tehlakam ban rung drok hapoh ka Jylla.
