Shillong, Nailur 29
U President ka UDP East Khasi Hills District, Bah Titosstarwell Chyne u la pyntip ba haduh mynta ym pat don ki Jylli (Circle) ban phah ïa ki kyrteng jong ki kyrtong ban ïakhun ïa ka ilekshon MDC, wat la ka por ba la buh kan kut ha ka 30 tarik Nailur 2024.
U la ïathuh ba ha East Khasi District ki don 10 tylli ki konstitwensi hynrei ki don tang ar tylli ki konstitwensi ba ka UDP ka don MDC, kata ma u na Sohra konstitwensi bad u Bah Ryngkat Lyndem na Langkyrdem konstitwensi.
U la ïathuh ba ki jylli jong ka UDP ki bym don MDC haduh mynta ki long ka Mawryngkneng, Nongkrem, Mawkynrew, Mawphlang, Sohïong, Mawsynram, Mylliem bad Shella kaba u MDC ba la jop bunsien na ka UDP u Bah Teinwell Dkhar uba dang shu khlad ha kine ki bnai ba la dep.
U Bah Titos u la ïathuh ba ka UDP East Khasi Hills ka la aipor ïa ki jylli ba kin pynpoi ïa ki kyrteng jong ki kyrtong hapoh ka 30 tarik mynta u bnai hynrei haduh mynta ka Sngi Saitjaiñ ym pat don ba phah.
Shuh shuh u la ïathuh ba ki don ki jylli kiba la dep ïashong jingïalang hynrei kim pat phah ïa ki kyrteng jong ki kyrtong bad namar kata u kyrmen ba kin sa phah noh kloi.
U Bah Titos u la pyntip ruh ba ka CEC jong ka UDP kam shym la buh por ba ki district kin phah ïa ki kyrteng jong ki kyrtong hynrei ki shaniah ha ki district ba kin phah ïa ki kyrteng shwa ban poi ka sngi ban pynbna ïa ki kyrteng jong ki kyrtong.
U la ong ba ha kane ka kynti, ka ilekshon MDC ha JHADC bad KHADC kan sa long beit namar ka tnat Ilekshon jong ka Sorkar Jylla ki la dep khot jingïalang ïa ki seng saiñ pyrthei ba kin ïakren halor ka EVM.
Haba kylli ka don ne em ka jingïasngewthuh jingmut hapdeng ka UDP bad HSPDP ban pynbeit ïa ki kyrtong ha kane ka ilekshon, u Bah Titos u la ong ka UDP bad HSPDP haba ki don ha ka RDA ki don ka jingïasngewthuh jingmut hynrei haduh mynta kim pat don kano-kano ka jingïakren shaphang ki kyrtong.
