Nongstoiñ, Nailur 29
Ha ka 26 tarik u Nailur 2024, ka Hynñiewtrep Youths’ Council (HYC) West Khasi Hills District ka la leit ban aiti ïa ka jingthoh sha u Executive Engineer ka West Khasi Hills Distribution Division MePDCL Nongstoiñ halor saw tylli ki mat ba ki paidbah ki ud ki nam.
Ha ka kyrwoh khubor, u samla Lumlang Kharsyiemlieh President bad u samla Wanteibok Lyngdoh General Secretary ka HYC West Khasi Hills ki la pynpaw ba ha katei ka jingthoh na ka liang ka HYC West Khasi Hills ha ryngkat ka HYC Ri Mulliang Circle ka la pynpaw ïa ka jingsngewkmen bad ai khublei ïa ka MePDCL ba ka la pynïoh ka jingïarap ïa u heprit Isboklang Wanniang na ka shnong Langja uba la mynsaw na ka jingshah bat bording 5 bnai eiei mynshuwa.
Sa kawei ka mat, ka HYC ka la buh jingkylli halor ka jinglum kyrteng ïa ki longïing ban ai ‘Connection Free’ ha kine ki bnai kiba la dep ki la long kumno namarba dang don ki shnong bym pat don bording ilektrik haduh mynta hapoh West.
Shuh shuh halor ka jingkiew ka bai bording, ka HYC kala pynpaw ba ka jingkiew ka bait hang bording ha kine ki sngi, don ki jaka ba ka kiew 30% don ruh 40% ne 50% wat 60%. Kane ka la pynlynga bad pynshaïong ïa ki paidbah.
“Ngi ïohi ba ka Sorkar na ka por sha ka por ka ju pynkylla ïa kata ka Billing System ha kaba dang ha u snem 2021, ki dang pyntreikam da kata ka Billing System kaba ki ong ka UGO ne Utility on the Go’ kaba dei ka Kompeni nabar, hynrei mynta 2024 tang hapoh 3 snem ki la leh sa kawei pat ka system thymmai kata ka UBS lane Unified Billing System kaba long hi ka Kompeni kaba nabar. Kane ka rukom treikam nang ïohnong mano nang duhnong u paidbah, hato kane mo ka jingtreikam jong ka MePDCL ban shakri ïa ki paidbah?” ong ka HYC.
Shuh shuh kala pynpaw ruh da kaba ong ba, hato ka MePDCL kam don mo ïa ki Engineer kiba lah ban shna ïa kita ki Billing System haduh ba hap ban wanrah lane thied na shabar namar lada ka long kumne kan wan ka por ba yn hap phai biang sha ki juk thang sharak.
Ki Nongïalam ka HYC ki la dawa ruh ïa ka MePDCL ba kan shimkhia bad pyrkhat bha ïa kane ban shna ïa ki Bill katkum ka jingpyndonkam ym ban ñion eh ïa ki paidbah tang na ka daw ba ka ophis ka hap ban siew ïa ki ram ki shah ban pynkit bad lute na ki paidbah te kam ïahap satia.
Kawei pat ka dei halor ka jingkiew ka bai ‘Deposit’ ne apply bording thymmai, ha ka snem ba la dep ka dang poi 8000 haduh 9500 bad bai Meter, mynta pat ka la poi 20000 duna khyndiat, bad ka HYC halor kane ka la pynpaw ba kane ka long kumba ñion beiñ ïa ki paidbah Ka la buh ruh ïa ka jingkylli kaei ka daw ba ka bai apply thymmai ka kiew haduh katne?
Kumta na ka liang ka HYC ka kyntu jur ïa ka shlem treikam ban pyrkhat bha ïa kane namar myn ha kane u Myntri ba bat ïa ka tnat Power u la ong ba ka Smart Meter ka dei ka Central Scheme hynrei balei mynta pat ki paidbah ki hap siew haduh 20000, ha kajuh ka por ka HYC ka kyrpad jur ïa ka tnat ba dei peit ban pynbeit bha ïa kane ka kam kaba la ktah shibun eh ïa ki paidbah jong ka West Khasi Hills District hi baroh kawei.
