Jowai, Nailur 29
Kum shi bynta ban rakhe ïa ka World Rabies Week 2024, ka tnat ka koit ka khiah jong ka Sorkar Jylla ha ka 27 tarik Nailur ka la pynlong ïa ka prokram pynsngewthuh shaphang ka jingpang Rabies ha LP School Nangbah, West Jaiñtia Hills District halor ka phang “Breaking Rabies Boundaries.”
Ïa kane ka prokram la ïatreilang ryngkat ka tnat ri mrad jong ka District kumjuh ki waheh shnong na ki shnong bapher ka District ha ka jingdonlang u District Medical & Health Officer (DMHO), u District Surveillance Officer (DSO), u Medical Officer ka Koit ka Khiah i/c Nangbah, AH & Veterinary Officer, Veterinary Dispensary, Nangbah bad kiwei kiwei ki ophisar, ki khynnah skul, Self Help Group, ki nongshong shnong ka Nangbah Iawmusiang bad kiwei kiwei.
Haba pdiang sngewbha ïa baroh, u Medical Officer i/c Nangbah, PHC u Dr. D Hinge u la batai ïa ka jingkordor jong kane ka prokram pynsngewthuh, kaba thmu ban ïarap ïa ki paidbah ban sngewthuh ïa ka jingma jong ka jingpang Rabies bad ka jingdonkam ban pyndkut noh ïa u kynjri jong ka jingpang Rabies lyngba ka jingai tika.
U Dr. M Syngkon, District Surveillance Officer u la batai shaphang ka jingpang Rabies Infection, ka jingsaphriang jong ka, ki dak ki shin (Sign & Symptoms). U la ban jur ruh ïa ka jingdonkam ban ïoh ïa ka dawai Anti Rabies lada jia ba shah dait ha ki ksew ne kino kino ki jait mrad. U la kdew ruh ba ka jingai tika ka lah ban pynim lada ai kloi bad ba ki dawai ki long kiba khlem jingsiew.
U Dr. E Chen, u AH bad u Vet ophisar, Nangbah, West Jaiñtia Hills, u la batai ba ka jingai tika ha ki mrad ruh ka long kaba donkam kumjuh kumba ai tika ha ki briew bad ba ki briew ki dei ban ai tika ïa ki mrad ba ki ri na ka bynta ban ïakhun pyrshah ïa ka jingpang Rabies.
U la batai ruh shaphang ki dak bad ki jingpang Rabies ha ki mrad khamtam ha ki ksew. U la kyntu ïa ki nongshong shnong ban wanrah ïa ki mrad ba ki ri sha Veterinary Dispensary na ka bynta ban ai dawai khlem jingsiew ïa ki mrad kum shi bynta jong kane ka jingpeit bniah.
U DMHO, West Jaiñtia Hills, u Dr. K Dhar ruh u la pynpaw ïa ka jingïaroh halor kane ka jingïatreilang hapdeng kine ki ar tylli ki tnat bad kumjuh ruh ïa ka jingïatreilang jong ki nongshong shnong bad ka Dorbar Shnong. U la kitbok kitrwiang ba kum kane ka jingpyrshang ban ïatreilang kan dang ïai bteng ym tang na ka bynta ban pynduh ïa ka jingpang Rabies hynrei ban ïada bad ïakhun pyrshah ïa kiwei pat ki jingpang.
