Shillong, Nailur 29
U MLA ka Voice of the People Party (VPP) Mawlai Konstitwensi, Bah Brightstarwell Marbaniang, u la pyntip ba ki don hynñiew haduh phra ngut ki nongkyrshan ka VPP kiba la pan tiket ban ïakhun ïa ka ilekshon MDC na Mawlai Konstitwensi.
U Bah Bright u la ïathuh baroh ki kyrteng kiba la pan tiket la dep phah sha ka Central Executive Committee ka VPP. U la pyntip ba ka shong ha ka CEC ba kan shim ïa ka rai ïano ka ibit ba kan ai tiket ban long u kyrtong ka VPP na Mawlai Konstitwensi.
Haba kylli lano ka VPP kan pynbna ïa u kyrtong. Une u MLA u la ong ba ïa kata ka shong beit ha ka CEC.
Haduh mynta ki seng kiba la thikna ban ïakhun ïa ka ilekshon MDC na Mawlai Konstitwensi ka dei na ka VPP, na NPP ban ïakhun hi da u MDC ba mynta Bah Teibor Pathaw, UDP bad kiwei.
Ha kane ka jingpynkhreh ïa ka ilekshon MDC, wat na ka liang jong ka NPP bad ka UDP kiba synshar ha ka Sorkar Jylla, ki la phah shithi lut sha ki jylli ne block ba kin phah noh ïa ki kyrteng jong ki kyrtong ki b?n ïakhun ïa ka ilekshon MDC sha JHADC bad KHADC.
Ha kawei pat ka liang, u Bah Heavingstone Kharpran uba dei u MLA ka VPP na Mawryngkneng konstitwensi u la ïathuh ba ki don saw ngut ki rangbah kiba la pan tiket ban ïakhun ïa ka ilekshon MDC na Sohryngkham konstitwensi na ka VPP.
U Bah Kharpran u la pyntip ba ha kaba nyngkong ki don hynñiew ngut ki nongkyrshan ka VPP kiba la pan tiket hynrei hadien ki lai ngut ki la kynrandien noh bad haduh mynta ki don beit saw ngut kiba pan tiket.
U la ïathuh ba napdeng kine ki saw ngut, ka shong ha ka rai jong ka Central Executive Committee (CEC) ka VPP ba kin shim ïa ka rai ïano kin jied uwei napdeng ki saw ngut kiba la pan tiket ban long u kyrtong ka seng ha ka ilekshon MDC.
Une u MLA ka VPP u la pyntip ruh ba kine ki saw ngut kiba la pan tiket lada kim ïoh ruh ki la rai ban ïatreilang ban wanrah jingjop ïa u kyrtong ka VPP lada ka ai tiket ha uno uno ruh.
U Bah Heavingstone u la ïathuh ba ka seng ryngkat ki nongkyrshan ki hap ban trei shitom ha kane ka ilekshon MDC khnang ba u kyrtong ba ka seng kan pynïeng un ïoh ïa ka jingjop.
Ha Sohryngkham konstitwensi ka jingïakhun kan long kaba itynnad namar ka VPP kan hap ban ïakhun pyrshah ïa u MDC ba mynta u Bah Pyniaid Sing Syiem uba dei na ka NPP bad uba long ruh CEM jong ka KHADC.
